Getxoko Udaltzaingoak J.G.N.Z. 28 urteko auzokidea atxilotu du, genero indarkeria delitua leporatuta. Gertaera ostiralean izan zen, 22:15ak aldera, Algortan, udal iturriek zabaldu dutenez. Ordu horretan, kalean, gizon eta emakume baten arteko liskarra gertatzen ari zela iragartzen zuen deia jaso zuten Udaltzaingoaren Koordinazio Zentroan. Tokiko poliziak bertaratu ondoren, lekukoek adierazi zieten gizonak emakumea kolpatu zuela eta horrek kolpatua izatearen zantzuak zituen. Gainera, ustezko egilearen kontrako biktimarekiko urruntze agindua zegoen indarrean, gaineratu dutenez. Horregatik, udaltzaingoek gizona atxilotu zuten. Emakumea erietxera eraman zuten zauriak sendatzeko eta atxilotutakoa epailearen esku utzi zuten. Udaletik gogoratu dutenez, Gizarte Zerbitzuen alorrak (944660151) aholkulari juridikoa eta arreta psikologikoa ematen ditu eta tratu txarren biktimentzako Eusko Jaurlaritzaren 900 840 111 telefono zenbakira ere jo daiteke; baita Udaltzaingora (944660202), Erizaintzara (944063420) eta SOS Deiak (112) zerbitzura ere. Argazkian, joan den asteartean Caridad Angeles Rodriguez Arrieta Tolosako emakumearen erailketa salatzeko elkarretaratzea egin zuen Algortako Bilgune Feministak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun