Getxoko Udaltzaingoak lau gidari atxilotu ditu asteburuan edari alkoholikoen eraginpean gidatzea egotzita
Getxoko Udaltzaingoak lau gidari atxilotu ditu asteburuan edari alkoholikoen eraginpean gidatzea egotzita. Tokiko iturriek zabaldu dutenez, lehenengo atxiloketa larunbatean izan zen, goizaldeko 3etan, gidari batek Areetako Joaquin Arellano kalean aparkatuta zeuden hainbat ibilgailuren kontra talka egin ondoren. Bertaratutako poliziek egiaztatu ei zuten aipatu lagunak ez zuela gidatzeko baimena eta gainera edari alkoholikoen eraginpean zegoela. 07:30ean beste gidari bat atxilotu zuten Algortako Sarrikobaso kalean, bide segurtasunaren kontrako delitua egitearen akusaziopean, emandako tasa 0,60 gramo alkohol litro odolekoa izan zela. Atzo, igandean, 06:30ean, hirugarren gidari bat atxilotu zuten Itzubaltzeta / Romoko Santa Eugenia kalean, alkoholaren eraginpean gidatzen ari zenean. Horrek gidatzeko baimena kenduta zuen. Laugarren gidaria Sarrikobaso kalean atxilotu zuten, 08:00etan, 0,60 gramo alkohol litro odoleko emaitza eman zuelako. Getxoko Udaltzaingoaren arabera, horientzat guztientzat hiru eta sei hilabete arteko kartzela zigorra egongo da edo sei eta 12 hilabete arteko isuna eta gida-baimena urte bat eta lau urteren artean bertan behera uztea. Argazkian, Getxoko udaltzain bat.
Gainera, beste hiru gidari salatu dituzte onartutako tasa gainditzea leporatuta, eta txosten zigortzailea zabaldu diete, hau da, 500 euro eta 4 eta 6 puntuen artean kentzea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun