Danimarkako "Afvist" lanak irabazi du Getxoko Zubiak Film Laburren I. Lehiaketa
Danimarkako "Afvist-Denied" filma izan da Getxoko Udalak antolaturiko Zubiak Aniztasunaren aldeko eta Arrazakeriaren kontrako Film Laburren I. Lehiaketaren irabazlea. "La Hégira" (Espainia) eta "Uwe+Uwe" (Alemania) pelikulek bigarren eta hirugarren sariak jaso dituzte, hurrenez hurren. "Arrazakeriaren kontrako tokiko borroka eta kultur artekotasuna, bizikidetza eta errespetua sustatze aldera" antolatu du lehiaketa toki erakundeak. Areetako Andres Isasi Musika Eskolan ostiralean ospatutako amaiera ekitaldian izandako sarien banaketaren ondoren, ikusleek saritutako film laburrak ikusteko aukera izan zuten. Elena Coria Immigrazio Unitateko zinegotzia "oso pozik" agertu zen balantzearekin, "Arrazakeriaren kontrako Nazioarteko Egunaren inguruan antolatutako lehiaketara aurkeztutako 21 lanen kalitatea ona izan delako eta gainera publikoari gustatu zaizkiolako". Lan irabazlean, 2009an babesa eskatzen zuten 80 errefuxiatu irakiar Kopenhageko eliza batetik ateraraztea ikus daiteke. Amaiera ekitaldira Aage Rais Nordentoft zuzendariak bidalitako mezu batean, saria eskertu ondoren, oso pozik agertu zen bere helburua hustearen istorioa eta ondorioak zabaltzea izan delako. Argazkian, film labur irabazlearen zuzendariaren mezua joan den ostiralean / © Getxoko Udala.
Bestalde, bigarren sariak, Liteo Delirok zuzendutako "La Hégira" filmak, bi nerabe musulmanen arteko amodio istorioa eta horietariko batek bizitza hobeagoaren bila joateko alde egiten duela kontatzen du. Halaber, Lena Libertak zuzendutako "Uwe+Uwe" hirugarren sarituak kamioilari aleman baten errefuxiatu afrikarren familia batekiko jarrera aldaketa uzten du agerian, hasieran beraiengatik alde egiten saiatzen delako eta amaieran onartzen eta beraiekin bizitza antolatzen amaitzen duelako. Gainera, Zubiak lehiaketak bi aipamen berezi eman zituen: Maysun Cheick Aliren "Mon Amour-Hormen istorioak" lanari eta Felipe del Olmo eta Daniel Valledoren "Ngutu" filmari. Azkenik, herritarrek aukeratutako film laburra New Zelandeko Welby Ingsen "Munted" izan zen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun