Bestalde, Leioako beste udaltzain batzuek atalondoan geratu ziren arratsaldeko 5ak arte, gutxi gorabehera, auzokide guztiak etxera heldu eta etxeetan ezer falta ez zela baieztatzeko. Atxiloketetan Erandioko ertzain-hiriko agenteek ere parte hartu zuten, atxilotuak bertara eraman zituzten eta atestatua egin zieten.
Herritarren parte hartzea
Ustezko bi gaizkileak atxilotzeko, herritarren parte hartzea "funtsezkoa izan dela" aipatu dute agintari leioaztarrek. Joan den hilean, Udalak bandoak jarri zituen atalondoetan Bilbo Handiko udalerrietan ematen ari ziren lapurreten berri emateko eta herritarrek babes neurriak har ditzaten. Babes neurri horien artean, pertsona edo joera susmagarrien aurrean, Udaltzaingoari deitzea zegoen. Dena dela, lapurreta horien ezaugarriak ikusirik, Udaltzaingoak zera gomendatu du: "etxeko atezain automatikoa jotzean etxean izanez gero, beti erantzun behar dela, eta deika dagoen pertsona ez bada ezaguna inoiz ere ez irekitzea atea".
Gizonezko bi atxilotu dituzte Leioako etxebizitzetan lapurtzen saiatzea egotzita
Leioako Udaltzaingoak gizon bi harrapatu zituen asteazken arratsaldez, biak 27 urtekoak, Iparragirre kaleko 20. zenbakiko etxebizitzetan lapurtzen saiatzea leporatuta. Leioaztar baten deiak ohartarazi zuen tokiko polizia, udal iturriek nabarmendu dutenez. Herritarrak bere etxe inguruan goiz osoan zehar hiru pertsona susmagarri ikusi zituela adierazi zion Udaltzaingoari. Segidan udaltzainek Iparragirre kaleko 20. atalondora hurbildu ziren. Bertan, ustezko hiru lapurrak harrapatu zituzten, eta "borrokan egin ostean", horietako bi harrapatu zituzten eta hirugarrenak alde egitea lortu zuen. Udaltzain bi zauritu egin zirela gaineratu dute. Azkenik, agenteek atxilotuak komisariara eraman zituzten eta bertan gainean zeramaten materiala atzeman zuten: besteak beste, sistema berezi bateko ateak zabaltzeko erabiltzen diren gakordeak eta bihurkin bat omen zituzten. "Tresna hauek azken aldi honetan Bilbo Handiko herrialdeetan ematen ari diren lapurretan oso erabiliak izaten ari dira", udal iturriek diotenez. Argazkian, Leioan "segurtasuna handitzen" doala zabaldu du gaur Udalak / © Leioa.net.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun