Tenperaturei dagokienez, maximoak 10-15ºC inguruan kokatuko dira, eta apur bat baxuagoak ere izan daitezke ostegunean, apirilaren 5ean. Labur esanda, Aste Santuan giroa freskoa izango da, eguraldia ezegonkorra eta zaparradak modu irregularrean banatuta egongo dira; zaparrada horiek ekaitz-zaparradak ere izan daitezke. Edonola ere, atmosferaren bilakaera hori berresteko, eguneratze berriak jarraitu behar dira, eta, beraz, datorren asteazkenean, apirilaren 4an, berriz ere eguneratuko dugu Aste Santurako iragarpen berezi hau.
Jarraian, iragarpena zehaztu da, itxuraz espero den bilakaera oinarri hartuta, eredu deterministaren azken irteerak kontuan hartuta:
Apirilak 5, osteguna
Zerua oso lainotuta egongo da. Prezipitazioak ahulak izango dira, baina tokian-tokian nahiko ugariak ere izan daitezke. Elur-kota 1.000-1.200 m inguruan egongo da. Ipar – ipar-ekialdeko haize ahulak edo nahiko indartsuak. Tenperaturak beherantz: minimoek beherakada txikia izango dute (1 eta 2 gradu artekoa), eta maximoek beherakada txikia edo nahiko handia (1 eta 4 gradu artekoa). Izozte ahulak gerta daitezke mendi-aldeetan.
Apirilak 6, ostirala
Zerua oso lainotuta egongo da, bereziki egunaren lehenengo erdian. Zaparradak ahulak izango dira, baina nahiko ugariak eta ekaitz-zaparradak ere bota ditzake. Elur-kota 1.200-1.400 m inguruan egongo da goizaldean, eta 1.500 metrorik gora ezarriko da goizean. Haizeak ahulak edota nahiko indartsuak izango dira; ekialdetik joko du haizeak. Tenperaturak gorantz: minimoek gorakada txikia izango dute (1 eta 2 gradu artekoa), eta maximoek gorakada nahiko handia (2 eta 4 gradu artekoa).
Apirilak 7, larunbata
Zerua oso lainotuta edo estalita egongo da. Zaparradak ahulak edo nahiko ugariak izango dira, eta ekaitz-zaparradak ere bota ditzake. Haizea ahul edo nahiko indartsu ibiliko da, eta aldakorra izango da. Goizean, iparraldetik joko du. Tenperatura minimoak apur bat igoko dira, eta maximoak ez dira aldatuko.
Apirilak 8, igandea
Zerua lainotuta egongo da, eta prezipitazio ahulak eta aldizkakoak bota ditzake, bereziki Kantauri isurialdean. Haizeak ahulak edota nahiko indartsuak izango dira; iparraldetik joko du haizeak. Tenperaturak ez dira aldatuko.
Apirilak 9, astelehena
Zerua lainotuta egongo da, baina arratsaldean lainoak gutxitu egingo dira. Prezipitazio ahulak bota ditzake. Haizeak ahulak edota nahiko indartsuak izango dira; iparraldetik joko du haizeak. Tenperaturak ez dira aldatuko.
Oharra: Iragarpenen fidagarritasuna txikitu egiten da denbora-horizontea handitzen den neurrian. Horregatik, Euskalmeten iragarpen ezberdinen eguneratzeak jarraitzea gomendatu dute.
Euskalmeten arabera, Aste Santuan lainotuta egongo da eta aldizka ekaitz-zaparradak botako ditu
Euskalmet Meteorologiaren Euskal Agentziaren arabera, Aste Santuko lehenengo egunetako ezaugarri nagusia ezegonkortasuna izango da. Iberiar Penintsulan behe-presio erlatiboak izango dira nagusi, eta laino ugari eta modu irregularrean banatutako zaparradak utziko dituzte penintsulako edozein puntutan; ekaitz-zaparradak ere izan daitezke. Zaparrada horiek Araba, Bizkaia eta Gipuzkoari eragin ahal diote, bereziki barrualdean eta ekialdean, baina kostaldera ere heda daitezke. Tenperaturei dagokienez, tenperatura maximoek jaitsiera handia jasango dute asteartean (apirilak 3) eta asteazkenean (apirilak 4), eta tenperatura horiek 10 eta 15ºC artean koka daitezke. Euskalmet-en iritziz, asteazkeneko (apirilak 4) azken orduetatik aurrera, ziurrenik, aire hotza sartuko da (aurreko egunetan itxaroten zena baino ahulagoa), ipar-ekialdeko haizeekin, eta, ondorioz, tenperatura maximoak berriz ere jaitsiko dira ostegunean (apirilak 5), zenbait prezipitaziorekin; prezipitazio horiek elur-erakoak izan daitezke mila metrotik gorako mendietan. Ostiraletik aurrera, eguraldi nahasiak jarraitu egingo du, eta larunbata izango da egunik euritsuena; hala ere, egoera hori aldatu egin daiteke datozen egunetan. Argibide gehiagorako, kontsultatu UKBERRI.NETeko eguraldi zerbitzua. Argazkian, hainbat neska aterki azpian, artxiboko irudian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun