Algortako 23 urteko gaztea zen Galeako itsaslabarretik eroritako txirrindularia

Hasiera batean, hildakoa 51 urteko Leioako bizilaguna zela zabaldu zuten arren, ordu batzuetara jakinarazi zuen Eusko Jaurlaritzaren Herrizaingo Sailak atzo Galeako itsaslabarretik eroritako txirrindularia 23 urteko gizonezkoa zela. "Deia" egunkariak zehaztu duenez, Algortakoa zen gaztea. Ertzaintzak abisua jaso baino hogei bat minutu lehenago salatu zuen mutilaren aitak bere semea desagertuta zegoela. Gertaera goizeko 9:20 inguruan izan zen. Oraindik argitzeke dauden arrazoiengatik, txirrindularia oinez iristeko zaila den leku batera erori eta hil egin zen, bertara joandako medikuak azaldutakoaren arabera. Ertzaintzaren helikoptero bat, Talde Mugikorreko agenteak eta suhiltzaileak gertaeraren lekura joan ziren hilotza erreskatatzeko. Argazkian, Galeako itsaslabarrak / cc-by-nc-nd bacigalupe.