Auziperatuak babesteko Getxo udalerriko taldeak adierazi duenez, "Euskal Herriak bizi duen une historiko honetan, gatazka politikoa eta bere ondorio guztiak konpontze bidean jarri ahal eta behar dira. Norabide horretan, salbuespen neurri eta legeak behingoz gaindituak izan behar dira. D3M eta Askatasunaren aurkako epaiketa oinarrizko eskubideen aurkako bortxaketa larria da. Etorkizunari ilusioz eta itxaropenez begiratzen diogunok, onartezintzat jotzen dugu horrelako epaiketak burutzea". Gauzak horrela, "arrazoi politikoak direla medio" epaiketaren zain dauden beste hainbat getxoztar gogoratu dituzte: Jose Luis Franco, Maite Amezaga, Marije Fullaondo, Gabi Basañez, eta Imanol Beristain, hurrenez hurren. Horiek ere atxilotuak eta espetxeratuak izan ziren. Orain kalean dira guztiak, esan bezala, epaiketen zain.
Herrialde zein nazio mailako ekimenak:
- Apirilaren 20an, Bilboko Plaza Berrian, Bizkaia mailako ekitaldia.
- Maiatzaren 5ean, nazio manifestazioa, arratsaldeko 5:30ean Bilbon.
D3Mren aurkako epaiketa salatzeko ekimen ugari izango dira aste hauetan Algortan
D3M hautesle elkarteko eta Askatasunaren aurkako epaiketa apirilaren 30ean hasiko da Espainiako Auzitegi Nazionalean. Auziperatutako 13 lagunen artean dira Iker Rodrigo lutxanarra, Eli Zubiaga algortarra eta Arantza Urkaregi Leioa eta Erandioko campuseko irakasle bilbotarra. Fiskalak 9 urteko espetxe zigorra eskatzen du hirurentzat. Horiei babesa emateko, besteak beste, Getxo udalerrian eta Erandion taldeak antolatu dituzte. Algortan deitutako mobilizazioen artean, larunbat honetan, apirilak 14, agerraldi jendetsua egingo dute Algortako Villamonteko eskaileretan, eguerdiko 12etan; herritarrak, lagunak, herriko eragileak, pertsona esanguratsuak... bildu nahi dituztela. Hilaren 18an, asteazkena, hitzaldia izango da kultur etxean, Villamonten, 19:30etik aurrera. Solasaldian auziperatuek parte hartuko dute. Hilaren 24an, berriz, mozioa aurkeztuko dute Getxoko udal batzarrean. Eta bi egun beranduago, 26an, eskualde mailako manifestazioa zeharkatuko ditu Algortako kaleak —beste horrenbeste egingo dute maiatzaren 11n Erandion—. Azkenik, apirilaren 30ean, epaiketa hasiko den egunean, kontzentrazioak izango dira auzipetuen herrietan. Algortan 19:30ean jarri dute batzeko ordua, Telletxe plazan. Argazkian, 2009ko martxoaren 25ean Espainiako Justiziak aske utzi zuen Eli Zubiaga Algortako alaba, bere senideek 6.000 euroko fidantza ordaindu ostean / Public Domain - Etengabe.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun