D3M hautesle elkarteko eta Askatasunaren aurkako epaiketa apirilaren 30ean hasiko da Espainiako Auzitegi Nazionalean. Auziperatutako 13 lagunen artean dira Iker Rodrigo lutxanarra, Eli Zubiaga algortarra eta Arantza Urkaregi Leioa eta Erandioko campuseko irakasle bilbotarra. Fiskalak 9 urteko espetxe zigorra eskatzen du hirurentzat. Horiei babesa emateko, besteak beste, Getxo udalerrian eta Erandion taldeak antolatu dituzte. Aipatu azken udalerrian, besteak beste, hitzaldi sorta antolatu dute: gaur, Lutxanako eskoletan; bihar, Altzagako erakusketa gelan; hilaren 16an, Goiherrin; eta 18an, Astrabuduako Josu Muruetan. Solasaldi guztiak 19:30ean izango dira. Bestalde, apirilaren 30ean, epaiketa hasiko den egunean, kontzentrazioak izango dira auzipetuen herrietan. Erandion 20:00etan jarri dute batzeko ordua, metro geltoki ondoan. Toki berean, prentsaurreko jendetsua egingo dute maiatzaren 6an, 12:00etan. Azkenik, maiatzaren 11n eskualde mailako manifestazioa izango da Erandion, 20:00etan metro geltoki ondotik abiatuta. Argazkian, 2009ko martxoaren 25ean Espainiako Justiziak aske utzi zuen Iker Rodrigo Lutxanako semea eta Erandion egin zioten lehen harrera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun