Luis Azul Quartet laukotearen musika eta poesia saioa helduko da Sopelako Kurtzio Kultur Etxera, larunbat honetan, apirilaren 14an. Olerkigintza eta musika gustuko dutenentzat ikuskizun aproposa da laukote bizkaitarrak eskaintzen duena, zalantzarik gabe. Musika-taldea lau lagunek osatzen dute: Luis Mateos (ahotsa eta gitarra akustikoa), Gabriel Leon (kontrabaxua), Andoni Muniozguren (pianoa) eta Alberto Cans (bateria). Halaber, Cesar Canales poeta kantabriarrak bere olerkiak irakurriko ditu kontzertuaren hasieran. Izan ere, Luis Azul Quartet taldearen abesti gehienak Canalesen olerkietan oinarrituta daude. Saioa 20:00etan hasiko da, eta sarrerak 3 euroko kostua izango du. Dagoeneko eros daitezke Kurtzio Kultur Etxean, udaletxean eta Larrabasterrako Sopelarin udal bulegoan. Argazkian, Kurtzio Kultur Etxea / © Sopelako Udala.
Luis Azul Quartet laukotearen letrek hausnarketarako bidea zabaltzen dute, eta hainbat gai jorratzen dituzte: bakoitzaren buruaren hazkunde pertsonala, naturarekiko errespetua, eta abar. Laukoteak hiru urteko ibilbidea du, eta epe horretan hainbat kontzertu eskaini ditu. Askoren ustez, pop musika lantzen duten musika taldeen artean, Luis Azul Quartet “harmonia gehien” duen taldeen artean dago. Bere musika-estiloa "pop" legez defini badaiteke ere, jazz eta swing ukituak ere baditu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun