Leioa zein inguruetako 14 eta 35 urte bitarteko artista gazteek udalerriko txokoak hartuko dituzte maiatzaren 13an, igandearekin, orduan ospatuko baita Udalak antolatutako Margolari Gazteen Lehiaketa. 15. edizioa izango da aurtengoa. Beraz, hitzordu ezaguna da artista gazteen artean, beraien lanak garatu eta lehen sariak eskuratzeko aukera dutelako urtero. Aurten, beti bezala, txapelketa goizeko 8etatik 15:00etara izango da. Leioako Aterpe Gazte Bulegoak antolatuta, eta Kultur Leioa zein La Caixa-ren babespean, aurtengo edizioa berrikuntza gutxirekin dator baina sari potoloekin. Irabazleak, 810 euro jasoko ditu; bigarrenak, 510 euro; eta hirugarrenak, 360 euro. Gainera, diploma bana jasoko dute lehenengo hirurek. Sari bereziei dagokienez, herriko margolaririk onenak 360 euro eta diploma irabaziko ditu. Eta saririk jaso ez duen 18 urtetik beherako margolanik onenari 120 euroko bonoa eta diploma emango diote. Epaimahaiaren erabakia 19:00etan jakinaraziko dute Aterpe Leioa Gaztegunean (Aldapabarrena, 2) eta momentu horretan bertan sariak banatuko dira. Argazkia: © Leioa.net.
Aurkeztutako lanak Errekalde plazako Nagusien Etxean ikusgai egongo dira, maiatzaren 24tik ekainaren 24ra bitartean. Halaber, uztailaren 2tik 31ra bitartean, saririk jaso ez duten obren jabeek beraien lanak berreskuratu ahal izango dituzte, aldez aurretik jasotako gordekinaren truke. Behin epe hori bukatuta, jabea obraren bila azaltzen ez bada, obra hori Aterpe Leioa Gaztegunearen esku geratuko da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun