Saneamendu Sarea Berriztatzeko eta Hobetzeko Aparteko Planaren harira, 50 jarduera inguru egin dira udalerriko toki estrategikoenetan, nagusiki behe-aldeetan, Gobela ibai inguruko arroetan, tartean Itzubaltzeta / Romon, Negurin, Makaletan, Maidaganen, Sarrikobason, Aldapan, Ollarretxen eta Ereagan. Toki horietan estolda-sarea hobetu da, zenbait kasutan, uholdeen problema eta besteetan, euri-jasek eragindako ibaien gainezka egitearen eta euri-putzuen arazoa behin betiko konpontzeko asmoz. Jardunbide orokorraz gainera, Joseba Arregi Hirigintza zinegotziak azaldutakoaren arabera, Udalak jabeen erkidegoei aholkularitza eskaini die garaje, trasteleku eta sotoetan ur-putzuak direla eta jasaten dituzten arazoen gainean. “Aholku eta laguntza eman diegu aipatu jabeen erkidegoei beren sare propioak hobetu eta jarduera orokorra osotzeko gure ustez egin behar zituzten lan txikien inguruan”, aipatu duenez.
Jardunbide orokorrak, oro har, bi ezaugarri nagusi izan ditu lanak egiterakoan: batetik, euri sareak eta ur zikinenak banandu ditugu eta, bestetik, sare horietan hodi handiagoak ipini dira. Udalak garatutako proiektuarekin lotutako beste jarduera garrantzitsuenetako bat da Uren Partzuergoak Neguriko Akaziak kalean duen etengailua martxan jarriko dutela laster, udal saneamendu sarea etengailu horrekin konektatu eta gero.
Saneamendu sarea berriztatzeko aparteko azken lanak agindu ditu Getxoko Udalak
Getxoko Gobernu Taldeak Algortako Txikia plaza inguruko saneamendu sarea hobetzeko lanak agindu ditu eta, hartara, udal "Saneamendu Sarea Berriztatzeko eta Hobetzeko Aparteko Plana osotuko da", agintari getxoztarrek gaurko prentsaurrekoan azpimarratu dutenez. Imanol Landa EAJko alkateak eta bere taldeak aurreko legegintzaldiaren hasieran abiatu zuten egitasmoa, udalerrian "uholde arriskurik handien duten auzoetan ibaiak gainezka egitearen eta ur-putzuen arazoa konpontzeko". Planak 5 milioi eurotik gorako inbertsioa izan du, eta "horregatik, Getxon azken hamarkadetan saneamenduaren esparruan aurrera eraman den proiektu handiena da", alkateak berak gaur adierazi duenez. Plan horren barruan jasotako azken obrak dira, hain zuzen, orain 236.000 bat eurotan esleitu eta Fadura aldean egingo direnak. Lanak Makaletako Etorbidean egingo dituzte, Salsidu eta Txikia plaza artean (zati osoa hartuko ez badituzte ere). Sarea konpontzeko lanak amaitzeko epea 3 hilabetekoa da eta maiatzeko lehen egunetan hasiko dira. Argazkian, Imanol Landa alkatea eta Joseba Arregi Hirigintza zinegotzia gaurko prentsaurrekoan / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun