Egitaraua:
- Apirilaren 17an, asteartea, “El Franquismo en Euskal Herria” liburua aurkeztuko da, Iñaki Egaña, Euskal Memoria Fundazioaren partaide eta liburuaren egilearen eskutik (entzuleek liburua %20ko deskontuarekin erosi ahal izango dute).
- Apirilaren 19an, osteguna, “Gorpuzkinak ateratzen, duintasunak berreskuratzen”, hitzaldi eta proiekzioa izango da, Francisco Etxeberriaren eskutik, Aranzadiko Antropologia Fisikoaren Saileko zuzendaria eta Lege Medikuntzako Irakaslea EHUn.
- Horretaz gain, maiatzaren 11ra arte, Memoriaren Bulegoa zabalik egongo da. Bertan, senitartekoen inguruko informazioa jaso eta eman ahal izango da (asteazken eta ostegunetan Kultur Leioan 11:00-14:00 / 17:00-20:00; 699 809 130 telefonoa; www.leioa1936-1945.info web orrialdean edota leioa1936[abildua]yahoo.es helbide elektronikoan).
- Hurrengo astetan ere hainbat ekintza izango dira.
Aranzadi Zientzia Elkartearekin elkarlanean, proiektu bat jarri du martxan Leioako Udalak, "1936-1945 urte arteko udalerriko errealitatea artean ikertu eta ezagutzeko, eta eskubide zibilen eta giza eskubideen urraketa jasan zuten pertsona haien oroimena berreskuratzeko". Egitarauaren barruan, aste honetan, bi hitzaldi izango dira Kultur Leioan (4. solairua), 19:30ean hasita, sarrera dohainik: bata, gaur bertan, “El Franquismo en Euskal Herria” liburuaren inguruan; eta bestea, ostegunean, “Gorpuzkinak ateratzen, duintasunak berreskuratzen” lelopean. Hala ere, aipatu gaiek tirabirak eragin dituzte azken aldean Leioan. Martxoko udal batzarrera aurkeztutako mozioa "bertan behera botatzea" leporatu zion Lau Haizetara Gogoan elkarteak Eneko Arruebarrena alkate jelkideari, "horiek aurkezteko eskumena udal ordezkariei dagokiela" aipatuta, beste hainbat argudioen artean. Besteak beste, abiazio faxistaren 1937ko bonbardaketek 14 hildako eta 34 zauritu eragin zituzten udalerrian, aipatu erakundeak zabaldutako datuen arabera. Hala ere, oraingo jardunaldietan sostengua eskaini dio Arantzadiri Lau Haizetara Gogoanek. Argazkian, hitzaldietako bat eskainiko duen Francisco Etxeberria antropologoa / © Aranzadi.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun