Pinosoloko proiektuagatik ikertutako enpresei fakturak ordaintzea "eskandalagarritzat" jo du Leioako Bilduk

Erabiltzailearen aurpegia Ukberri 2012ko api. 17a, 18:36

Pinosoloko kiroldegiaren egitasmoa agindu zitzaien enpresei 1.629.326 euroko fakturak ordaintzea onartu zuen Leioa Kirolak udal erakundeko administrazio kontseiluak, apirilaren 4an egindako bilkuran. EAJ eta Ezker Batuaren aldeko botoekin hartutako erabakia "eskandalagarritzat" jo du gaur Leioako Bilduk. Koalizio ezkertiarrak gogoratu duenez, Lehiaren Defentsarako Euskal Zerbitzuak ikertuak izaten ari dira aipatu sozietateak, esleipena "era irregularrean eta legez kontra eginez" lortu zutelakoan. Fakturen ordainketa "EAJ-EBren arteko erabaki politikoa besterik ez" dela adierazi dute Arkaitz Fullaondo eta Elixabete Moral Leioako Bilduko zinegotziek. Ildo horretan, Eneko Arruebarrena alkate jelkideak kontratatutako abokatuak egindako txosten juridikoa "espresuki erabaki politiko horri men egiteko landuta" dagoela salatu dute. Halaber, PSE-EE eta PPren "konplizitatea" ere agerian utzi nahi izan dute: lehen aipatu batzarrean, "PSEko zinegotzietako baten egon ez izanak oposizioak gehiengoa ez izatea erraztu zuen. Gainera, PSE eta PPk fakturen ordainketaren kontrakoak zirela agertu zuten baina, bide batez, fakturen ordainketa onartu zuten abstentzioa bozka emanda", azaldu dute Fullaondok eta Moralek. Bildukoen ustez, kontratua baliorik gabe uztea eta prozesu parte-hartzaile baten oinarritutako proiektu berri bat egitea litzateke "konponbide bideragarri bakarra". Argazkian, Moral eta Fullaondo gaurko prentsaurrekoan.

Aros Estudio de Arquitectura, Excavaciones Viuda de Sainz eta Pujol Arquitectura dira susmopean dauden sozietateak; baita "EAJ eta EBren konfiantzazko enpresa den" Arcain ere, Leioako Bilduk argitu duenez. Azken urteetan horiei guztiei esleitutako kontratuei buruzko informazioa ere eskatu du koalizio ezkertiarrak, baina "Mari Carmen Urbieta Hirigintzako zinegotziak eskariari erantzunik ez dio eman", Fullaondok eta Moralek kritikatu dutenez. Are gehiago, Arcain enpresaren kasuan, "informazioa ezkutatu izana" egotzi diote Arruebarrenari: "583/12 dekretuaren bidez alkateak kontratu hori bertan behera utzi zuen. Kontratu horren helburua Torresoloko igerilekuen jolas-kiroletako gunearen erredakzioa egitea zen. Zinegotzi batzuei informazioa ezkutatzeko dinamika berdinari jarraituz, Hirigintzako batzordean aipatutako azken horri buruz tutik ez", salatu dutenez. Hori dela eta, Leioako Bilduk "premiazkotzat" ikusten du gertaera eta erantzukizun guztiak argituko dituen ikerketa batzorde bat eratzea. Orain, susmopean dauden enpresa horiei fakturak ordaintzea erabaki izanak "are larriagoa" egiten du egoera, ezkertiarren ustez.

Leioako Bilduk plazaratutako prentsa oharra (pdf)

Kirolak Leioa
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun