"Breve historia del anarquismo vasco" izenburuko liburua aurkeztuko dute ostiral honetan, apirilak 20, Plaza Beltza herri kultur gunean. Hitzordua 19:30ean izango da, Larrabasterrako Akilino Arriola kaleko egoitzan; eta bertan izango da aipatu lanaren egile Juantxo Estebaranz idazle bilbotarra. Loiolako koarteleko militar matxinatuen altxamendua zapuztu zuten 1936an; Beorlegi koronelaren tropei aurre egitera joan ziren Aiako Harrira; Aieten eta Kontxan Francoren aurkako hainbat ekintza egiten saiatu ziren… Anarkismoaren historia zabalaren sintesia idatzi du Estebaranzek. Durruti anarkista ezagunak Donostiatik alde egin behar zuenekoa eta beste hainbat pasarte ere berreskuratu egin ditu argitalpen berrian. Izan ere, Kursaalen Alfonso XIII. Espainiako erregearen aurka prestatzen ari zen atentatua agerian geratu omen zen.
Orohar, gerra aurrean eta gerra ostean anarkistek Euskal Herrian egindako borroka islatu du idazleak. Xaho, Marc Legasse, Galo Diez, Angel Aransaez, Gregorio Suberviola, Felix Likiniano, Casilda Hernaez eta Isaac Puente anarkisten biografiak ere jaso ditu bere azken historia liburuaren orrialdeetan. "El hilo negro de los noventa, encuentros con la autonomia" (2000) eta "Comandos autonomos. Un anticapitalismo iconoclasta" (1996) liburuen egilea da Estebaranz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun