Epaiketaren izaera "guztiz politikoa" salatu dute D3M eta Askatasuneko auzipetuek

Maiatzaren 3an Espainiako Auzitegi Nazionalak abiatuko duen auzian ″proiektu politiko bat defendatzeko eta gauzatzeko eskubidea″ epaitu nahi dutela gaitzetsi zuen Eleak mugimenduak, joan den ostiralean, Bilbon eginiko ekitaldian. D3M eta Askatasunako auzipetuen izenean, berriz, Arantza Urkaregik hartu zuen hitza. Leioa eta Erandioko campuseko irakasleak azpimarratu duenez, epaiketa "guztiz politikoa" izango da, "proiektu politiko bat defendatzeko eta gauzatzeko eskubidea" epaitu nahi dutela. "Zenbat aldiz entzun dugu esaldi hura; bonbak ala botoak" adierazi zuen auzipetu bilbotarrak, Rubalcabaren esaldi ezaguna gogora ekarriz. "ETAren armak isildu egin dira baina botoa emateko eskubidea defendatzeagatik epaituak izango gara", salatu zuenez. Amaitzeko, maiatzaren 5ean Bilbon "Epaiketa politikorik ez! Eskubide guztiak proiektu guztientzat!" lelopean, Casillatik abiatuko den manifestazio nazionalean parte hartzera deitu zuten jendarte osoa. Aste honetan bertan, Algortan izango da eskualde mailako manifestazioa: ostegunean, apirilak 26, 19:30ean, Telletxe plazatik abiatuta. Argazkian, apirilaren 14ean dozenaka lagunek erakutsi zieten elkartasuna Eli Zubiaga algortarrari, Iker Rodrigo lutxanarrari eta D3M eta Askatasunaren aurkako epaiketan auzipetutako gainontzeko lagunei Algortan.