![](http://farm8.staticflickr.com/7109/6967603474_14f8402a85_n.jpg)
Dozenaka herritar bildu da gaur arratsaldean Algortako Telletxe plazan, Espainiako Auzitegi Nazionalaren aginduz zein Ertzaintzaren eskutik heldutako azken debekuak salatzeko. Besteak beste, GALek orain 27 urte eraildako Xabier Galdeano kazetari algortarraren aldeko ekitaldia, Aitor Elortza Unanue errefuxiatua zenari duela sei urtetik egiten zitzaion omenaldia eta presoen urtebetetzeak izan dituzte aipagai; baita Etxerat elkarteak astegunetan egun ohi duen kontzentrazioak azken aldian jasaten ari den "jazarpena" ere. Euskal Herrian zabaldu berri den "galdu ezinezko aukera" honetan, "orain arte gertatu ez direnak" ikusten ari direla salatu du galarazpen horiei erantzuteko sortu den kaltetuen batzarrak. Hala ere, ez dute besoak gurutzatuta gelditzeko asmorik. "Konponbidea behar dugu" leloa eurena eginez, larunbat honetarako, apirilak 28, eskubide zibil eta politikoen aldeko ekitaldia deitu dute Algortan; eta dozena bat eragile baino gehiagoren babesa eskuratu dute. Ekitaldia 13:00etan izango da Telletxe plazan. Argazkian, gaurko agerraldia.