Gotzon Alcalde Etxeandia preso politiko algortarra epaitu dute gaur Madrilen. 1998an, Algortan, Guardia Zibilaren patruila baten kontrako atentatua prestatzea egotzita, 18 urte eta hamar hilabeteko kartzela zigorra eskatu du fiskalak. Hala ere, Alcalde libre uztea ebatzi du Espainiako Auzitegi Nazionaleko Zigor Arloko hirugarren epaitegiak, hainbat albiste agentzien arabera, "litekeena delako Alfonso Guevara epaileak askatasuna ematea". ETAko militanteak lagundu zituela aitortu arren, inolako ekintzatan parte hartu zuenik ukatu egin du Alcaldek. Hain zuzen ere, ETAri laguntzea egotzita, 7 urteko espetxe zigorra bete zuen Frantzian eta 2011ko uztailaren 12an eraman zuten Espainiara. "Epaiketara joandako lagunak herrian daude jada, albisteak ezustean harrapatu baititu. Gotzonen gurasoak eta anaiak, berriz, Valdemoroko espetxera bidean dira. Ziurrenik gaur aterako dute, baina ez dakite zein ordutan izango den; ez Algortara gaur edo bihar etorriko diren; ezta gaur etortzekotan zein ordutan izango den ere", adierazi dute gertukoek. Argazkia: public domain Algortako Herrira.
Epaiketan Patxi Markes preso berangoztarrak eta Iñaki Bilbao gatibu urduliztarrak deklaratu dute lekuko gisa. "Hauek esandakoaren arabera, Gotzonek laguntza ematen zuen hainbat kontuetan, baina inoiz ere ez ekintzak egin edo prestatzeko. Zer egiten zuten ez zioten inoiz kontatzen, segurtasunagatik ere", azaldu du Etengabe errepresioaren kontrako eskualdeko bitakorak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun