Etorkin indiarren semea, oso gaztea zela hasi zen Iyer musikaren munduan era autodidaktikoan eta pianoa belarriz jotzen. Urteak pasa ahala, gero eta gehiago interesatu zen jazz musikarengatik eta, Yale Unibertsitatean fisikan eta matematiketan graduatu eta gero, Bird Kage klubeko jam session-etan hasi zen jarduten piano-jotzaile titular. Garai horretan zenbait talderekin eta Steve Coleman eta George E. Lewisekin ere jarduten zen, bere jarduera profesionala finkatzen hasi zela.
Goranzko jarduera horretan piano-jotzaile, musikagile eta ekoizle emankorrenetako bat izatea erakutsi du Iyerrek eta genero eta estilo anitzetako artistekin aritu da. Nabarmentzekoa da Stephan Crumbekin eta Marcus Gilmorerekin osatzen duen hirukotearen jarduera. 2010. urtean Grammy sarietarako izendatu zuten hirukotearen "Historiocity" disko apartari esker. Halaber, lan bikaina burutu du Fieldor kolektiboarekin, Tirtha ganbera hirukote asiarrarekin eta Rudresh Mahanthappa saxo-jotzailearekin.
2010ean Amerikako Jazz Kazetarien Elkarteak saria eman zion Urteko Musikari Onenaren mailan. Urte berean Jazz Echo Award saria eskuratu zuen, Europako sari garrantzitsuenetako bat, hain zuzen ere. Egun, Vijay Iyerrek jarduera musikala uztartzen du Manhattaneko Musika Eskolarako eta New Yorkeko Unibertsitaterako eta Musika-inprobisaziorako Eskolarako egiten dituen musikologia ikerlanekin.
Urtero legez, Getxoko Jazzaldiak omenaldia egingo dio etzi, larunbatean, Pio Lindegaardi, jaialdi bizkaitarraren laguntzaile nagusienetariko bat izan zenari. Hori dela eta, larunbatean, azken urteotan indar handiz jazz eszenan finkatu den Vijay Iyer piano-jotzaile eta musikagile estatubatuarraren hirukotea jardungo da Areetako Andres Isasi musika eskolan, 20:00etan. Vijay Iyerrek (1971, Albany; New York) jarduera bikaina osatu du jazzaren munduan eta, horri esker, egungo eszenaren musikari ospetsuenetariko bat bilakatu da. Maila handiko artistekin jardun da elkarlanean, esaterako Steve Coleman, Roscoe Mitchell, Wadada Leo Smith, Burnt Sugar, Oliver Lake, DJ Spooky eta Rudresh Mahanthappa. Taldeko lider lanetan nabarmentzekoa da bere hirukotearekin eginikoa. Horrez baliatuta punta-puntako jazz musikarien artean kokatu da. Argazkian, Vijay Iyer eskuman, hirukotearen beste bi kideekin / © Getxoko Kultur Etxea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun