Getxo Rugby taldeak Espainiako Ohorezko Mailako final-laurdenak jokatuko ditu bihar, igandearekin. Getxoztarrak etxetik kanpo ariko dira, Alacanteko La Vila Joiosa herriko Pantano zelaian, nonbait Fadurako moduko giroan. Izan ere, Ohorezko Mailako sei talderik onenak batzen dituen play off horretan La Vila taldeak zelaian jokatzeko abantaila izango du, 4. izan baita ligan. Bryce Bevinen mutilak bosgarren sailkatu dira, ordez. Norgehiagoka 12:30ean abiatuko da eta aurretik La Vila faborito agertzen bada ere, gauzak ez daude hain argi. Ligako emaitzei begiratuta, Fadurakoek berdindu eta galdu egin dute Alacantekoen aurka, baina talde katalanak krisi ekonomiko sakonean bizi da, bertako agerkari digitalak zabaldu duenez. Egoera horrek giroa nahasteaz gain, hainbat jokalarik dagoeneko beste konpromiso batzuk hartzea eragin du. Gauzak horrela Mark Hewitt entrenatzaileak ez du Jhonathan Phipps, Jarrid Els eta Nathan Reid zelairatzerik izango. Horretaz gain, Espainiako Selekzioak Marcos Poggi deitu du Eskozian jokatzeko. Gauzak horrela, Bryce Bevin Getxoko entrenatzailea eta La Vilako entrenatzaile ohia baikorra, anbizio handikoa eta zuhurra agertu da, aldi berean. Taldeak jakinarazi duenez, konfiantzaz gainezka daude. Argazkian, La Vila eta Getxo arteko aurreko partida bat / © Getxo Rugby Taldea.
Dena den, Bevinen ustez dagoeneko arrakasta izan da play off-eraino heltzea eta hemendik aurrera lor lezaketena "oso motibazio handiko talde baten lana eta sakrifizioaren fruitua" izango da. La Vilaren barne arazoengan baino, bere mutilen lanean sinesten du Zeelanda Berrikoak: "gainetik pasatuko ditugula pentsatzen duenak erabat erratuko da" dio. "Ondo ezagutzen dut klub hori eta eskarmentu eta dedikazio handiko jendea dagoela jakin badakit. Igande honetan egongo direnak izen gutxiago izan dezakete baina bihotz eta determinazio gehiago izango dute. Hori mehatxu oso arriskutsua da", azaldu du Brycek. Horregatik, jokalariei dena ematea eskatu die: "Dena dago jokalarien esku. Haiek dira urratsa bat aurrera eman eta topera jokatu behar direnak".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun