Aurresku, luncha eta besarkada ugari ikusi ziren Sopelan, larunbat arratsaldean. Sopelako lehenengo gaztetxearen bultzatzailea izan zen Gotzon Alcalde eta oraingo Sekeko gaztetxera joan zen bildutako jendeaz lagundurik. Bertan ere harrera egin zioten.
Apirileko azken ostirala
Gotzon Alcalde preso ohiari harrera egin aurretik, 219 lagun elkartu ziren Algortako Telletxe plazan, euskal preso eta iheslari politikoen eskubideak aldarrikatzeko asmoz. Oraingo honetan, Amnistiaren Aldeko Mugimenduan ibilitako herrikideei egokitu zitzaien elkartasunaren kinkea hartzea. Modu horretan, "urte guzti hauetan amnistiaren alde eta errepresioaren kontra aritutako lagunei gorazarre" egin nahi izan die Algortako Herrira bilguneak. Bitartean, beraiek "tortura, kanporaketa, sarekada, jazarpen, sakabanaketa, isolamendua eta deportazioarekin amaitu eta preso eta iheslariak etxera ekarri arte borrokan jarraitzeko" deia zabaldu zuten. Horren adierazle, kanaberaz egindako espetxea apurtu ere egin zuten. Anje Duhalderen "Amnistiaren dema" entzunez eta kantatuz amaitu zen ekitaldia.
Sopelan, berriz, 60 lagun inguru elkartu ziren "presoak etxera ekar daitezen" eskakizuna eginez eta "bizi osorako zigorra bertan behera uzteko" eskatuz. Euri jasaren azpian eman zuren elkarretaratzearen denbora guztia, baina azpimarratzekoa zen guztion aurpegian zegoen alaitasuna, Sopela.net agerkariak adierazi duenez. Zergatia argia zen: Gotzon Alcalde presoa kalean dago eta herrian preso bat gutxiago dagoela guztien aurpegian islatu egin zen.
Eskualdeko gainontzeko herrietan ere izan ziren kontzentrazioak: besteak beste, Leioako Bulebarrean 72 lagun elkartu ziren, Itzubaltzeta / Romoko Xake plazan 115, Barrikan 24, Urdulizko BBVAren aurrean 17, eta Bernagoko Gudarien plazan 21.
Gotzon Alcalderi Algortan egindako harrera (cc-by Algortako Herrira)
Gotzon Alcalderi Sopelan egindako harrera (© Sopelako Herri Bilgunea)
Hileko azken ostiraleko ekitaldiaren ostean, lehen harrera egin zitzaion, ostiralean, Algortako Amnistia taberna aurrean, aurreko egunean kartzelatik ateratako Gotzon Alcalderi. Aurresku dantza eta hizlari baten hitzen ostean, berari heldu zitzaion berba egiteko txanda. Gotzonek barruan gelditu direnak gogoratu eta hitz bakarrean definitu zuen espetxe barruan bizi den egoera: "tortura". Presoak eta iheslariak ekartzeko "premia" azpimarratu zuen berak. Azkenik, "Eusko gudariak" abestu ostean, argazkia kentzera abiatu zen preso ohia taberna barrura, atzean lagun eta herrikideak zituela. Sopelan, berriz, larunbat arratsaldean egin zioten harrera Gotzon Alcalderi. Sopela.net agerkari digitalak azaldu duenez, berak ere han bildutako guztiak gertutik agurtu zituen eta oso giro hunkigarria eta gertua sortu zen. Argazkian, Gotzon Alcalde Sopelako harreran / © Sopelako Herri Bilgunea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun