Akusazioaren arabera, Martinek eta Jose Luis Martin Carmona etakide ohiak ETAren enkarguz jarri zuten lehergailua, kilo eta erdi amosalez eta 250 gramo pentrita eta dinamitaz osatuta zegoena. Dena den, Ertzaintzak desaktibatu zuen aipatu bonba eta ez zuen eztandarik egin. "ABC" egunkariaren arabera, aipatu ekintzagatik aspaldi zigorra ezarri zioten Carmonak Martini atentatuaren prestaketan laguntzea leporatu dio. Martinen defentsak, ordea, deklarazio horiek Carmonak jasotzen dituen espetxe-pribilegioekin harremana duten galdetu ei dio, iturri beraren arabera.
Martinen aldeko elkarretaratzearen bideoa (© Herrira)
Gaixotasun larria duen Txus Martin preso basauriarra epaitu du gaur goizean Espainiako Audientzia Nazionalak. 1993ko irailaren 6an Leioako Ibaiondo auzoko Amaia Etorbideko 4 eta 6. atarien artean eztanda egin ez zuen lehergailu bat jarri izana leporatu eta berarentzat 10 urteko zigorra eskatu du Marcelo de Azcarraga fiskalak. Martinek Langraitzeko espetxetik deklaratu behar izan du bideokonferentzia bitartez. Epaiketaren harira, Herrirak elkarretaratzea egin du EAEko Auzitegi Nagusian Martin askatzeko eskatuz beste behin ere. Gogoratu dutenez, basauritarrak gaixotasun larria dauka eta bi aldiz saiatu da bere buruaz beste egiten. Gaixotasun larriak dituzten presoak espetxean mantentzea eskubideen urraketa bat dela salatu du Herrirak eta egoera horretan aurkitzen diren Martin eta beste 13 euskal preso politikoak aske uzteko eskatu dute. Argazkian, Bilbon egindako kontzentrazioaren irudi bat / cc-by-nc-sa Sos Txus Martin.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun