Lantalde horretako kideak ondokoak dira: Bizkaiko Foru Aldundiaren izenean, Kulturako zuzendari nagusia, Kultura Ondarearen Zerbitzuko burua eta Errestaurazio arloko arkitekto bat. Getxoko Udalaren izenean, berriz, Hirigintzako zinegotzia eta udal arkitektoa. Egitura sendotu eta saneatzeko lanak finantzatzeko, Foru Aldundiak beste higiezin “enblematiko” batzuetan erabilitako prozedura berbera jarraituko du. Esaterako, Bilboko Erruki-etxe Santu eta Errealarekin erabilitakoa: eraikin horretako bi kupula birgaitzeko lanek foru laguntza izan zuten eta, horretaz gain, Kultura Ondarearen Zerbitzuaren aholkularitza teknikoa eta asistentzia be bai.
Emango diren pausuak
Punta Begoñako galerien kasuan, lan-metodo bera erabiliko litzateke, foru iturrien arabera. Hain zuzen, lehenengo, esku hartzeko proiektu bat idatziko da, kaltetuta dauden atalak finkatzeko, eta ondoren, monumentuaren ezaugarrietara eta egoerara egokitzen diren erabilerak aztertuko dira. Behin lan horiek amaitu eta ebaluazio ekonomiko zehatza egin ondoren, Foru Aldundiak diru-laguntza bat emango dio Getxoko Udalari, egin beharreko lanak burutzen laguntzeko. "Galerien ezaugarriak kontuan hartuta, ekitaldi bat baino gehiago beharko da lanak burutzeko, eta beraz, diru-laguntza urte batzuetarako ekarpena izango dela aurreikusten dute. Eta zenbateko zehatza ezarri ondoren, urte kopuruaren arabera zatituko litzateke zenbateko hori. Lehen hurbilpen gisa, bi milioi euro inguruko diru-laguntza aurreikusten dute, beti ere, lantaldeak bere diagnostikoa burutzen duenean zehaztuko dutena", azaldu dutenez.
Gernikan gaur izan den Bizkaiko Batzar Nagusien bilkuran, Kultura Sailak aurreratu du bi milioi euro emango dituela Algortako Punta Begoñako galeriak berriztatzeko. Luxuzko hotela egiteko proiektua bertan behera uztea erabaki zuten otsailaren bukaeran Barcelo Hotels Mediterraneo SL enpresako arduradunek eta Getxoko Udalak. Hori horrela, tokiko erakundeak azpiegitura horren birgaitze integralari ekitea erabaki du. Eta foru erakundeak ontzat eman eta erabakia gauzatzen lagundu egingo du. Horretarako, Aldundiak eta Getxoko Udalak lantalde bat osatu dute, honako helburu biak dauzkana. Lehena, higiezina finkatzeko modua aztertzea, Labein-Tecnaliaren txostenaren arabera egitura ez dagoelako ondo eta neurri zuzentzaileak aztertzea eta gorpuztea beharrezkoa delako. Eta bigarrena, Punta Begoñako galerien erabilera potentzialen azterketan aurrera egitea. Argazkian, Iñaki Uriarte arkitektoa Begoña Gazteluko galeriei buruzko azalpenak emanez, hainbat eragilek galerien erabilera publikoa aldarrikatzeko ekitaldian / © Getxosarea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun