Pintxoez gozatzeko bonoak atera ditu Sopelako Udalak

Erabiltzailearen aurpegia Ukberri 2012ko mai. 8a, 10:22

"Sopela pintxoz-pintxo" egitasmoa abian jarri berri du tokiko Udalak, herriko turismoa eta ostalaritza bultzatzeko asmoz. Ekimen berritzaile horri esker, aurrerantzean Sopelako tabernetako pintxoak dastatzea "errazagoa" izango da herrira hurbiltzen diren lagunentzat. Turistek eta sopeloztarrek 6,60 euroren truke bonoa erosteko aukera izango dute; eta bono bakoitzak sei pintxo erosteko aukera emango du, tokiko iturriek azaldu dutenez. Horretarako, Sopelako Turismo Bulegora (Loiola Ander Deuna, 28) edo Informazio Gunera (Aretxabaleta enparantza, 1) jo beharko dute interesatuek. Bonoa astelehenetik igandera erosi ahal izango da, maiatzetik urrira. Beraz, sei hilabeteko iraupena izango dute. Ondokoak dira ekimenean parte hartzen ari diren hamabi tabernak: Brendran´s Isle Irish Pub, Kafe Taberna Lurren, Denver, Txikitxu, Gurea, Batzoki, Etxebarri kafetegia, Gaztedi kafetegia, Txindor kafetegia, Völker Paulaner Bierhaus, Setien eta Kux-kux.

"Sopela pintxoz-pintxo" ekimenarekin, Udalak herriko ostalaritza bultzatu eta herrira hurbiltzen diren lagunei tokiko gastronomia ezagutzera eman nahi izan die. "Udan zehar, asko dira euskal sukaldaritzagatik galdezka Turismo Bulegora hurbiltzen diren lagunak. Egitasmo honekin, turistei erraztasunak eman nahi zaizkie, Sopelatik irten barik bertako gastronomiaz gozatzeko aukera izan dezaten", azaldu dute udal arduradunek. Halaber, turistez gain, sopeloztarrek ere bonoa erosi eta bere abantailez gozatzeko aukera izango dute.

Udako kanpaina

Bestalde, Sopelako Turismo Bulegoak eta Informazio Guneak dena prest dute udako kanpainarako. Hurrengo hileetan zehar, hainbat ekimen abian jarriko dira, bisita gidatuak kasu. Merchandising produktu berriak ere prest dituzte, eta ekainean Sopelbus autobus zerbitzua indartua izango da, garraio publikoa sustatzeko eta hondartzetako sarbidea errazteko helburuarekin. Iaz, inoiz baino bisitari gehiago heldu ziren Sopelara. Turismo Bulegoak eta Informazio Guneak 17.000 kontsulta baino gehiago jaso zituzten (2010. urtean, berriz, 13.000 izan ziren). Turista gehienak uztailean eta abuztuan heltzen dira Sopelara.

Ekimeneko esku-orria

Jendartea Sopela
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun