Bost euskal herritar hauen aurkako zigor gogorrarekin, indar erakustaldia burutu du Estatu espainiarrak, errepresioan oinarrituriko erakustaldia. Azken urteotan aldaketa nabarmen eta sakonak izan dituen errealitate politiko baten aurkako beste indar erakustaldi bat izan da Gorenaren azken ebazpen hau. Euskal jendartearen gehiengo batek, bakea, justizia eta demokrazian oinarrituriko etorkizuna ikuskatzen duen agertoki baten aurkako erantzun errepresiboa.
Ideia politiko guztien defentsa eta antolaketa askeak bermatuak izan behar dutela aldarrikatzen du euskal jendarteak. Ondorioz, egoera berri honetan ez dago lekurik, behin betiko eten behar dute, bake eta aterabideen aurkako agenda politiko eta judizialek.
Udal gobernu honek, beste behin ere, Arnaldo Otegi, Rafa Diez, Miren Zabaleta, Arkaitz Rodriguez eta Sonia Jacintoren berehalako eta baldintzarik gabeko askatasuna exijitzen du.
Udal gobernu honetatik, beste behin ere, gatazkaren konponbide demokratikoarekiko gure konpromisoan berresten gara, bai eta bide horretan egun espetxeraturik dauden lagunek egindako ekarpenaren aitortzan ere.
Maiatzaren 9an, Espainiako Auzitegi Gorenak, Bateragune auzian epaitu eta kartzela zigor urte luzeetara kondenatuak izan ziren Arnaldo Otegi, Rafa Diez, Arkaitz Rodriguez, Sonia Jacinto eta Miren Zabaletaren aurkako sententzia berretsi zuen. Estatu espainiarrak, beste behin ere, Euskal Herrian ireki den fase politiko berriaren aurkako norabidean urratsak ematen jarraitzen du. Aukerak ireki eta bide berrietan sakondu ordez, oztopoak jartzen jarraitzen du Madrilek. Herri honetan urte luzeetan desio izan dugun benetako bake eta demokraziarako aukera inoiz baino irekiagoa dagoenean dator ebazpen hau eta herritarren gehiengo zabalak ez du, ez ulertzen ez eta onartzen ere. Izaera politiko nabarmena duen epaia eman du Auzitegi Gorenak; herri honetako gehiengo politiko eta sozialarentzat agerikoa izan zen iazko ekainean buruturiko epaiketak eta osteko epaiak, herri honetan ematen ari diren urratsak oztopatu eta baldintzatzea zuela helburu. Argazkian, pasa den irailaren 24an Bateragune auziaren aurka Bilbon egindako manifestazioa / cc-by-nc-sa Iñaki Arrieta Baro.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun