![](http://farm8.staticflickr.com/7231/7197769160_94d79d10d0_n.jpg)
Extreme Man triatloia hartu zuen atzo Ereaga hondartza inguruak. Hori aprobetxatuz, Luzuero gaina inguruko dragaren kontrako elkarretaratze-argazkia egin zuen
Abra Bizirik Getxoko plataformak. Hitzordua 13:00etan jarrita zegoen Arriluzen eta 70 bat lagun elkartu ziren bertan. Eguerdiko 12etatik esku-orriak banatzen eta sinadurak batzen ere ibili ziren. Bilboko Portuak Punta Luzerotik gertuko kanpo-itsasoan, Abra II izeneko hondoan, hondar eta itsas-hondoko materialen 50 milioi metro kuboren erauzketa egiteko proiektua du. "Draga erraldoi horrek korronteetan, olatuen alturetan, hondartzetan, itsas-azpiko izadi eta landaredian zein arrantzan eragin kaltegarriak, berehalakoak, atzeraezinak eta iraunkorrak izango ditu", salatu zutenez. Getxoko zenbait auzokide eta elkarte, horretaz kezkaturik, urte hasieran biltzen hasi ziren Abrako hondar erauzketa erraldoi horrek eragin ditzakeen kalteez informatzeko, eta draga hori gelditu nahian. Horren ondotik, asanbladak, mobilizazioak, sinadura-bilketak... egin dituzte.