Lau saioetan entzun dugunak ez du zerikusirik Euskal Herrian bizi dugun egoerarekin. Benetan bi errealitate ezberdinekin egin dugu topo azken egunotan: alde batetik, Auzitegi Nazionalekoa, betikoa, iraganean erroturiko diskurtso zaharkitua: dena ETA da, bestetik, Euskal Herrikoa, jaso dugun elkartasuna, jasotako animo mezuak, epaiketa politikoak egiten jarraitzea ulertzen ez duen jende mordoen galderak… Euskal Herritik baino harago ailegatzen den elkartasuna, Madrileko eta Torrejon de Ardozen lagunen eskutik. Aurrez aurre dauden bi errealitate: gatazka gainditzeko ahaleginetan gaudenona eta gatazka konpondu nahi ez duen Espainiako Estatuarena.
Atzo (astelehenagatik) bertan Rajoyk berretsi zuen “ez direla mugituko”. Eta Bateragune auzia dela eta, Auzitegi Gorenak eman berri duen epaiak bide horretatik aldentzeko asmorik ez dutela ematen du. Baina ez gara etsipenean eroriko. Gure delitu bakarra Euskal Herriaren alde, aldaketa politiko eta sozialaren alde eremu ezberdinetan lan egitea izan dela oso argi dugu. Horregatik, lasai gaude. Euskal Herrian ireki dugun prozesua geldiezina da eta eskubide zibil eta politikoen alde sortzen ari garen olatuek mugiaraziko dute Rajoyren gerraontzia. Ez izan zalantzarik. Kostatuko zaigu, baina oztopo guztien gainetik, Euskal Herria libre izatea lortuko dugu.
Horregatik, ostegunean, irribarretsu agertuko gara epaileen aurrean. Eta irri handiagoa erakutsiz bueltatuko gara Euskal Herrira, lanera, epaiketa politiko gehiago egon ez dadin, pertsona ororentzat eta proiektu politiko guztientzako eskubide guztiak lortu arte.
D3M-Askatasuna auzian epaitzen dabiltzan Arantza Urkaregi Leioa eta Erandioko campuseko irakasleak Bilboko Branka agerkarian atzo argitaratutako artikulua
Datorren ostegunean berriro Auzitegi Nazionalera joan beharko dugu, epaiketaren azken saiora. Fiskalak akusazioak eta eskaerak mantentzen dituen ala ez jakingo dugu. Orain arte izandako saioetan ikusi dugunaren arabera, ez du ematen fiskalaren jarrera aldatuko denik eta bereari eutsiko diolakoan gaude: ETAko kide edo laguntzaileak izateagatik, denetara 109 urteko kartzela-zigorra. Epaiketa-saioetan argi geratu da akusazio horiek sostengatzeko argudioak jarduera politikoak besterik ez direla. Guardia zibilek eta poliziek guri buruz esan dutena da prentsaurrekoak eman ditugula, hauteskunde-zerrenda ezberdinetan parte hartu dugula, interbentoreak izan garela,… Baina beraien “esfortzu intelektualari” (beraien hitzak dira) esker, jarduera horiek ETAren estrategian kokatuta daudela konturatu dira eta, beraz, egindako guztia ETAren aginduz egin “omen” dugula. Argazkian, Arantza Urkaregi artxiboko irudian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun