D3M eta Askatasunaren aurkako epaiketaren azken eguna izan da gaurkoa Espainiako Auzitegi Nazionalean. Akusazioak eta Defentsak balorazioa eta azken ondorioak azaldu behar zituen gaurko saioan eta fiskalak Fernando Antia eta Aitor Liguerzanaren aurkako akusazioa bertan behera utzi du eta jaitsi egin ditu gainerako hamaika lagunentzat eskatuta zituen zigorrak, Berria.info agerkariak zabaldu duenez. Bederatzi auzipeturentzat eskatutako zigorra bederatzi urtetik seira jaitsi du, tartean Eli Zubiaga algortarra, Iker Rodrigo lutxanarra eta Arantza Urkaregi Leioa eta Erandioko campuseko irakasle bilbotarra daudela. Horiei guztiei ETAko kide izatea leporatzen die fiskalak. Xabier Isasa eta Jose Antonio Munduate santutxuarren kasuan, berriz, zazpi urtetik bostera jaitsi du eskaera. Azken hauei ETAri laguntza eman izana leporatzen die Vicente Gonzalez Mota fiskalak. Argazkian, apirilaren 14ean Algortan izandako agerraldi jendetsua.
Ministerio Publikoaren ordezkariak ETAren sarean parte hartu izana egozten die auzipetuei, eta D3M eta Askatasunaren aurkako epaiketan, erakundeak ekintza armatuak egiteari utzi izana ezin dela kontuan hartu adierazi du. Aitzitik, Jone Goirizelaia abokatuak auzipetu guztien absoluzioa galdegin du eta akusazioa D3M eta Askatasuna legez kanporatzeko osatutako txostenetan oinarrituta dagoela salatu du. Era berean, prozesu honetan egiaztatu ahal izan den froga bakarra auzipetuen parte hartze politikoa izan dela azpimarratu du.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun