Eneko Arruebarrena Leioako alkatearekin batera, Basaez auzoan eraikiko duten eliza berriaren lehen harria jarri zuen ostiralean Mario Iceta Bilboko gotzainak. Bertaratutakoen artean, besteak beste, Carlos Lazaro Inchausti eta Angela Grijelmo Petrement proiektuaren arduradun diren arkitektoak, Jesus Maria Arieta-Aruñabeitia Leioako parrokoa eta San Bartolomeko eliztarrak eta auzokideak izan ziren. "Laster egingo den eliza berria arkitektura aldetik kalitate handikoa izango da. Izan ere, Gotzaintzak hainbat proiektuen artean aukeratu izan du", azaldu dute udal iturriek. Aurreikuspenen arabera tenplua 2013ko maiatzerako amaituta egongo da. Kostua 1.500.000 eurokoa izan da; alde batetik, Leioako parrokiek ordaindutakoa, gutxi gorabehera %50, eta gainontzekoa epe luzerako kreditu batekin. Aita oblatuek alde egin zutenean, lehengo eliza kokatuta zegoen lurzorua higiezinetako promotore baten esku geratu zen. Horrela, Udalak eta Gotzaintzak akordio batera heldu ziren tenplu berri bat eraikitzeko. Horrela, 50 urteko udal lagapeneko lurzorua eskaintzen dio tokiko erakundeak, eta Elizak eraikin berriaren kostuez arduratuko da. Eraikin berriak egun dagoen eta ekainean botako duten eliza ordezkatuko du. Argazkian, eliza berriaren diseinua / © Leioako Udala.
Urbanizazio lanak San Bartolome inguruko egokitze lanetan barruan kokatzen dira. Gune horretan 230 etxebizitza inguru eraikiko dira, horietako 30 babes ofizialekoak. Horretaz gain, Artatza kaletik Basaezko goiko zonaldera arte urbanizatuko da (Kulturgunea, ikastetxea, baseliza eta parkearen ondoan); baita San Bartolome zein Atxukarro kaleen arteko gunea ere. Ekintza guzti horiek 5 milioi euro inguruko kostua izango dute. Horietatik miloi bi Udalak jarriko ditu, eta horrekin egingo diren lanen artean, ondokoak daude: San Bartolome kalea erabat berritu (lurrazpiko zerbitzuak, asfaltoa, espaloia eta argiak) eta baterian aparkatzeko aparkalekua egin; Atxukarro kalearen amaierako tartea erregularizatu, zuzkidura horiek ere atonduz; Altzagaondo parkea sortu (auzo guztian zehar ibili ahal izateko, Zarragabarrena, Altzagaondo eta San Bartolome parkeetatik), San Bartolome plazaren gaur eguneko azalera bikoiztu; eta ohiko probalekua berreskuratu. Obren lehenengo fasea amaituta dago jada. Orain bigarren faseari ekingo zaio Kulturgune, baseliza eta ikastetxearen inguruko zonaldea hartuz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun