120 auzokidek baino gehiagok parte hartu du Sopelako aurrekontuak azaltzeko batzarretan
Sopelako Udalak aurrekontuak jendarteratzeko egindako bileretan 120 auzokidek baino gehiagok parte hartu du. Tokiko erakundeak lau batzar antolatu zituen herriko lau auzo ezberdinetan: Sopelako herrigunean, Arriateran, Sopelmarren eta Larrabasterran. Bertan, Saioa Villanueva alkateak eta udal gobernuko gainontzeko zinegotziek aurrekontuak onartzeko prozesua nolakoa izan den azaldu zuten, lehenik eta behin. Horretaz gain, onartutako aurrekontu-proiektuaz aritu ziren eta eremu bakoitzak zenbateko diru-partida jaso duen. Udaleko eremu ezberdinetako aurrekontuak azaldu ostean, bertaratu ziren auzokide guztiek zalantzak argitzeko eta beraien auzoarekin lotura duten ekarpenak egiteko aukera izan zuten. "Horrela, udal ordezkariek zuzen-zuzenean sopeloztarrek egunerokotasunean bizi dituzten arazoak ezagutu zituzten", tokiko iturrien arabera. Argazkian, Arriaterako auzo-bilera / © Sopelako Udala.
Era berean, auzokideek aurrekontu parte-hartzaileen prozesua hobetzeko ideiak emateko aukera izan zuten. Izan ere, Sopelako Udalaren asmoa parte-hartzea bultzatzen jarraitzea da, tokiko agintarien hitzetan; "eta ez bakarrik aurrekontuen kasuan, udal erabakietan zeharka landuko den metodologia izango delako". Auzo-bileren bidez, "herritarren eta erakunde publikoen artean egun dagoen urruntasuna murriztea" da helburua, "demokrazia parte-hartzailearen bidean urratsak emanez". Sopelako Udalak auzo-bileretan parte hartu duten auzokide guztien parte-hartzea eskertu du. Halaber, oraindik auzo-bileretan parte hartu ez duten auzokideak animatu ditu etorkizunean antolatuko diren asanbladetan parte har dezaten.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun