Ostiral honetan, maiatzak 25, Madrileko Vicente Calderon zelaian Athleticek eta Bartzelonak jokatuko duten Espainiako Errege Kopako finala dela eta, jarduera ezberdinak prestatu dituzte eskualdeko hainbat Udalek. Besteak beste, Sopelan, umeek puzgarriak, jolas erraldoiak, mahai-futbola, Athleticen txapa-tailerra eta euskal dantzen tailerra izango dituzte, 19:00etatik aurrera, udaletxeko plazan. Gainera, txikientzako erromeria izango da. Bestalde, 18:30etik 21:30era Ardoa Barrura fanfarrea ibiliko da Sopelako kale eta tabernetatik, bazterrak girotzen. Getxo udalerrian, berriz, pantaila erraldoi bi ipiniko dituzte: bata, Algortako Telletxe plazan; eta bestea, Itzubaltzeta / Romoko Santa Eugenian. Gauza bera egingo dute Plentziako Jai Alai pilotalekuan, Atxiki taberna eta Udalaren eskutik. Leioari dagokionez, Kandelazubietan jarriko dute pantaila erraldoia. Eta Gorlizen, frontoian, txosna eta guzti, 19:00etatik aurrera. Argazkia: © Getxoko Udala.
Bitartean, Algortako Telletxe eta Itzubaltzetako Santa Eugenia plazetan tailerrak (aurpegia margotzeko, txapa zurigorriak egiteko...) izango dituzte txikiek, 19:00etatik aurrera. Halaber, bi fanfarrek girotuko dituzte Algorta eta Itzubaltzeta, partidak hasi baino ordu batzuk lehenago. Bestalde, Udalak bi elastiko zozketatuko ditu Errege Kopa egunean, biak ala biak Athleticen jantzi ofizialak. Baldintzak baldintza, bi elastikoen zozketan parte hartu ahalko dute Getxo udalerrian maiatzaren 9a baino lehen erroldatutako pertsona guztiek. Izena emateko eskabide orriak getxoztarren eskura izango dira udalaren webgunean, www.getxo.net, zein HAB-Herritarren Arretarako Bulegoetan. Eskabide orri txikiak beteta –izen-abizenak, DNIa, helbidea, telefono zenbakia eta posta-elektronikoa–, Algortako Telletxe (makillaje tailerraren ondoan) eta Santa Eugenia plazetan ipinitako kutxetan utzi beharko dira etziko 22:00ak baino lehen. Ondoren, saria lortzeko izena eman dutenak udalerrian erroldatuta daudela egiaztatuko du Udalak eta berriro kutxetan sartuko ditu izenak, Algortako kultur etxean, Villamonten, hilaren 29an jendaurrean egingo den zozketan ateratzeko. Azkenik, bi mila kapela zurigorri banatuko dira ostiralean. Elastiko zein kapeletan, besteak beste, finalaren data eta “Getxo Athleticegaz” leloa ipiniko dituzte.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun