Joseba Arregi Hirigintza zinegotziak adierazi duenez, “legegintzaldi honetan azken bultzakada emango diegu lurren kudeaketari eta indarrean dagoen plangintzak aurreikusten duena betez hiri-lurzoruan babestutako etxebizitzen eraikuntzari. Eta horretan dihardugu Udaletik era zuzenean eginez edo Eusko Jaurlaritzarekin edo sustatzaile pribatuekin elkarlanean. Esan dezakegu gaur egun 250 etxebizitza inguru ari garela egiten Alangon eta Ormazan”.
Bete beharrekoak
Etxebizitza horietako bat lortu ahal izango dute Etxebiden 2012ko martxoaren 28a baino lehen (behin-behineko BOE kalifikazioa jaso duen eguna da) Getxon erosteko aukera ematen duen babes ofizialeko etxebizitza baten eskatzaile gisa alta emanda dutenek. Gainontzeko baldintzei dagokienez, eskatzaileak ez du etxebizitzarik jabegoan eduki behar eta Getxon erroldatuta egon beharko du aipatu data berean, gutxienez 3 urteko etengabeko antzinatasunarekin edo 5 urtez azkeneko 10 urteotan. Diru-sarrerak, gehienekoak eta gutxienekoak, Eusko Jaurlaritzaren araudiaren arabera ezarriko dira 2011 erreferentzia gisa hartuz: 9.000 eurotik 39.000 eurora artean. Eta pertsona desgaituen kasuan, gutxieneko diru-sarrerak 3.000 eurokoak izango dira.
Getxoko Udalak hasi du jada Ormaza Bekoko babes ofizialeko 40 etxebizitzak erosteko aukera emateko prozesua. Etxe horiek, tokiko erakundeak eta aldi baterako enpresa elkarte batek sinatutako hitzarmenean jasotzen dira. Akordioaren arabera, enpresa etxegilea izango da etxebizitzak altxatuko dituena eta Udalak horiek esleitzeko prozesua zuzendu, kontrolatu eta babesteko ardura izango du. Jarduera horrek, guztira, 60 eta 80 metro koadro arteko azalera duten 40 etxebizitza eraikitzea aurreikusten du. Horietatik 2 pertsona elbarrituentzat egokitutakoak izango dira, beste 20 pisu 35 urtez azpiko gazteentzat eta gainontzeko 18ak kupo orokorrean sartuko dira. Promozioaren gaineko informazioa, etxebizitzen prezioa, ordainketa baldintzak eta banaketa-planoak, udal bulegoetan kontsultatu ahal izango dira. Onartutako pertsonen zerrendak udaletxeko eta Eusko Jaurlaritzaren Lurralde Ordezkaritza bakoitzeko iragarki-taulan jarriko dira ikusgai, eta udal webgunean (www.getxo.net) argitaratuko dira. Esleipenari dagokionez, jendaurreko zozketaren bitartez egingo da, notarioaren edo udal idazkariaren aurrean, familiaren osaketa etxebizitzaren programari eta azalerari egokitzea kontuan hartuz. Argazkian, Algortako Alango aldeko orubea, eraikitzen hasi aurretik / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun