Bi ertzain epaitu dituzte Kukutza eraitsi ostean uribekostar bat zauritzea egotzita
Pasaden irailean, Ertzaintza Errekaldeko Kukutza III gaztetxea indarrez hustu ostean, gune askeari babesa adieraztera gerturatu zen jendearen kontra oldartu zen. Hainbat zauritu eta atxilotu izan ziren, eta, horren ondorioz, zauritu askok salaketa jarri zuten Bilboko epaitegian Ertzaintzaren "gehiegikeria" salatzeko asmoz. Salaketetatik bat behintzat onartua izan zen eta Uribe Kostako lagun baten atxiloketan ibili ziren ertzainek falta-epaiketa izan zuten atzo eguerdian Bilboko Instrukzioko 10. zenbakiko epaitegian, gazteari tinpanoa kolpeka zulatu izana egotzita. Kukutzako zein BOMeko lagunak bertara gerturatu ziren “poliziaren bortizkeria” salatzeko eta “elkartasun adierazpenak kriminalizatzeari uztea exijitzeko”, Bilboko Branka agerkari digitalak zabaldu duenez. Halaber, epaitegi aurrean Iñaki Karro Kukutzako abokatuak, Carlos Hernandez SalHaketako kideak eta Aitziber Ibaibarriaga Bilduko zinegotziak hartu zuren hitza. Karro eta Hernandezen esanetan, hainbat izan ziren Errekaldeko istiluetan poliziaren aldetik erasoak jasan zituzten pertsonak; 75 lagunek dokumentatutako erasoak izan zituzten. Horietatik 23k salaketa jarri zuten; 29 parte judizial egon ziren eta beste 23 larrialdietako parteak izan ziren. Argazki eta testigantzen bidez 29 eraso gehiago ezagutu zituzten eta guztira 104 pertsonak kalteak jasan zituztela gogora ekarri dute. Argazkian, 2011ko irailaren 21ean, Ertzaintzak indarrez hustu zuen Kukutza III Bilboko Errekalde auzoko gaztetxea / © Bilboko Branka.
Epaiketaren harira azaldu zuten, Ertzaintzako agenteek identifikazioa ez izateak mugatu egiten duela haien nortasuna ezagutzea eta beraz, salaketa asko ezin izango direla aurrera eraman. Era berean, azpimarratu zuren “karga polizialak ez zirela manifestarien erasoen erantzuna izan” eta Rodolfo Ares Barne sailburuak irailaren 21-23 egunetako gertakarien inguruan zein egunerokotasunean “esandako gezurrak” salatu nahi izan zituzten. Aitziber Ibaibarriak jakitera eman zuen garai batean esan bazuten ere, oraingoan Arartekoaren txostenarekin berretsi nahi dutela, “Errekalden egondako Ertzaintzaren interbentzioa neurrigabea eta zentzugabea izan zela” eta epaiketa azken muturrera heltzea espero dutela. Era berean salatu zuen “bere garaian Ertzaintzaren jokabidearen alde agertu zirenak, alkatea buru, egun isilik mantentzen” direla, Arartekoaren txostena argitaratu eta astebetera. Bukatzeko Rodolfo Ares Barne sailburuaren dimisio eskatu zuen beste behin ere.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun