Eusko jaurlaritzako Larrialdiei Aurre Egiteko eta Meteorologiako Zuzendaritzak abisu horia ezarri du igande arratsaldera arte, ordubetean 15 litro metro koadroko baino gehiago pilatzeko probabilitate txikia dagoelakoan. Izan ere, trumoi-ekaitza izateko aukerak handiak dira eta zenbait lekutan zaparrada handiak eta txingorra bota ditzake. Gaur goizeran hegoaldeko haizea ibiliko da baina gero ipar-mendebaldera aldatu eta eguraldiak txarrera egingo du nabarmen Euskalmet Meteorologiaren Euskal Agentziaren arabera. Eguerditik aurrera ipar-mendebaldeko haizeak joko du, kostaldean zakarki gainera, eta hodeiak ugaritu egingo dira. Zaparradak ere ekarriko ditu haize horrek eta ekaitzak ere bai; zenbait lekutan euria indar handiz egiteko aukera izango da eta kazkabarra ere bota lezake. Igandean ere giro freskoa espero da. Ipar-mendebaldeko haizea ibiliko da eta tenperatura maximoak 20 gradu inguruan geratuko dira. Egunaren lehenengo partean zaparrada handiak bota ditzake. Arratsaldetik aurrera, eguraldia hobetuz joango da: atertu egingo du eta ostarteak zabalduko dira apurka-apurka, Euskalmetek asmatuz gero. Argibide gehiagorako, kontsultatu UKBERRI.NETeko eguraldi zerbitzua. Argazkian, hainbat neska aterki azpian, artxiboko irudian.
Astelehenari dagokionez, eguraldi ona edukiko ei du berriro. Aurreko egunetako ezegonkortasuna desagertuko da eta goizean goiz hodeiak desegingo dira. Hortik aurrera zerua hodei gutxirekin geratuko zaigu. Tenperaturak ere lagunduko du eta igoko da, 22-24 gradu inguruko maximoekin.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun