Xabier Saenz de Gorbearen ibilbidea luzea eta saiatua izan da euskal arte modernoaren eta garaikidearen eremuetan, eta adibidez arte kritiko, komisario, ikerlari, sustatzaile eta Arte Ederretako fakultateko irakasle izan da. Arte kritiko moduan, epaimahaiak prentsan eta aldizkari espezializatuan luze aritu dela aitortu du. Laurogeiko hamarkadatik ia ehun erakusketen komisario izan da; erakusketa gehienek lotura dute euskal arte moderno eta garaikidearekin; horien guztien artean ondokoak nabarmendu dituzte: Guiard, Arteta, Tellaetxe, Lucarini, Oteiza, Basterretxea, Ortiz de Elgea, Dionisio Blanco, Mikel Diez Alaba, Iñaki de la Fuente eta beste batzuei eskainitakoak. Saiakera eta monografia anitz idatzi ditu euskal artista horien eta beste batzuen inguruan. Gainera, Remigio Mendibururen obra katalogatu du.
1971. urtean Windsor galeriaren fundatzailetako bat izan zen, Euskal Artisten Elkarteko (1983. urtean sortu zen) kide aktibo izan zen eta Eusko Jaurlaritzako Kultura Kontseiluaren aholkulari izan zen 1988tik 1991erako epean. Gainera, Eguzki Argitaraldiko arte aholkularia da, zenbait katalogo eta kartel diseinatzen ditu eta ETBrako eta Bizkaiko Foru Aldundirako arteko bideoen gionista eta errealizadore izan da. Halaber, ondoko meritua ere badu: hirurogeita hamarreko eta laurogeiko hamarkadetako euskal arte garaikideko agiriak, kartelak eta aldizkariak bildu eta artxibatzen ditu, eta jarduera hori ez zaio askotan aitortu; horiek guztiak, azterketa kritikorako eta geroko oroimenerako funts oso baliotsua osatu dute.
Xabier Saenz de Gorbea Arte Ederretako fakultateko irakasle areetarrari Eusko Jaurlaritzaren Gure Artea saria emango diotela jakinarazi dute gaur goizean. Iragarleak Antonio Rivera Kultura, Gazteria eta Kirol sailburuordea eta Fernando Golvano epaimahaiko presidentea izan dira. Gainera, Saenz de Gorbeak ikusizko arteen eremuan egin duen jarduera 15.000 euroz sarituko dute. Bestalde, Esther Ferrer eta Sergio Prego gipuzkoarrei beste Gure Artea sari bana eman diete, ibilbide artistikoari eta sormen jarduerari erreparatuta, hurrenez hurren. Biek ala biek 25.000 euro jasoko dute. Sarien bidez, "saridunek egin duten lana nolabait ordaindu eta arte garaikidean eta euskal kulturan egindako ekarpena onartu nahi" du Jaurlaritzak. Argazkian, 2007an Saenz de Gorbeak "Uribe Kosta" liburuxka kaleratu zuen, inguruko hainbat artelan zabaltzeko asmoz, tartean Enrique Areilza Arregir doktorearen omenez Moises Huertak egindakoa Gorlizen / © Garikoitz Estornes - Eusko Ikaskuntzaren Euskomedia Fundazioa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun