Josu Rodriguez eta Mikel de Gregorioren kontrako zigorrak aztertuko ditu bihar Auzitegi Gorenak
Kale borroka taldea osatzea egotzita, Josu Rodriguez eta Mikel de Gregorio gazte algortarrei ezarritako launa urteko espetxe zigorrak aztertuko ditu asteazken honetan Espainiako Auzitegi Goreneko bigarren aretoak, Europa Press albiste agentziak zabaldu duenez. Tribunalak bista publikoa egingo du bihar eta horren gaineko ebazpena emango du, Perfecto Andres epailea txostengilea dela. Auzitegi Nazionalak 2011ko urrian zigortu zituen aipatu bi mutilak eta eskualdeko beste bederatzi gazte absolbitu zituen. Auziari Espainiako Polizia Nazionalaren Bilboko Informazio Brigada Probintzialak 2007ko urriaren 16an Uribe Kostan egindako atxiloketekin eman zitzaion hasiera. Guztiei kale borroka taldea osatu eta 2004tik 2007ko uztailera bitarteko hamar ekintza inguru leporatzen zieten. 2011ko irailaren 19tik 22ra epaitu zituzten. Argazkian, epaiketaren egunetan Algortan egindako mobilizazioa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun