Orduan, ur laginak analizatzera bidaliko zituela agindu zuen Gobelak kaltetutakoen elkarteak, baina nitratoak, beruna, artsenikoa, kadmioa eta metal astunak egongo zirela aurreikusi zuen. Horren aurrean, Arturo Aldekoa Bizkaiko Batzar Nagusietako PPren ordezkariak Gobelan eta bertan elkartzen diren erreketan egon zitekeen kutsaduraren gaineko informazioa eskatu zion Aldundiari, Getxo eta Leioako antzinako zabortegietatik irten zitezkeen lixibiatuen beldur. Izan ere, zabortegian utzitako hondakinetan barrena iragazten den eta hartatik jariatzen den edo hark bere baitan duen likidoa da lixibiatua.
Aldundiaren erantzunak "aho bete hortz eta kezkatuta" utzi ditu popularrak, hauek zabaldu dutenez. Ingurumen Sailak aitortu legez, Gobelako hiru gunetan egin dituzte ikerketa fisiko-kimikoak eta biologikoak, baina haietan ez da bilatu artseniko, lindane edota metal astunik, "Getxoko eta Lleuri II-Zuazoko (Artea merkataritza gunea) antzinako zabortegien inguruetan topatzea espero daitezkeen gai kutsakorrak", Andradek ziurtatu duenez.
Gobela ibaian metal astun kutsakorren agerpena ekiditeko asmoz, dagokien administrazioei (udalak eta Ura agentzia) kontrol zorrotzagoak egin ditzaten bultza dezan eskatuko dio Bizkaiko Foru Aldundiari alderdi popularrak. Izan ere, artseniko, lindane edota metal astunek zor dezaketen kutsadura aurreikusteko analisirik ez dutelako egiten kezka agertu du Getxoko PPk. Eduardo Andrade Getxoko zinegotzi popularrak gogoratu duenez, "pasa den apirilean prentsak hainbat auzokideen salaketak argitaratu zituen". Auzotarren kexa iturria Gobelan egiten ziharduten hobekuntza hidraulikoak izan ziren. Haien ustez "Neguri Langileko ibarrean lixiabituak azaleratu zirela ageri" gelditu zen. Argazkian, Eduardo Andrade.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun