Keltse Eiguren Ingurumen Arloko zinegotziak bere poztasuna agertu du, beste behin, lortutako bi sariengatik: "hauen bitartez gure hondartzen kalitatea, eta baita Udala, udalerri iraunkorrago bat lortu aldera, egiten ari den lana ere aintzat hartzen direlako. Gure hondartzak guztien on dira, gero eta ahulagoa den herri eremua osatzen dute, eta horregatik, horiek zaindu beharra dugu, eta horiek errespetatzen eta partekatzen ikasi behar dugu".
Azkorriko hondartzak 1992an lortu zuen bandera urdina lehenengo aldiz eta horrez geroztik, aurtengoarekin, 19 bider eskuratu du (salbuespen bakarra Prestigeren isurketek eragin zuten). Hondartzaren ezaugarri bereziengatik garrantzi nabarmena du ingurugiroko ikuspuntutik, alde batetik dunen ekosistemagatik eta bestetik, bere hondar-lurzoru bigunean Euskal Herrian bizi den apo lasterkariaren (Bufo calamita) bi populazioetako bat bizi delako. Ereagako hondartzan, ordea, bosgarren urtez izango da bandera urdina (aurrekoak 2006, 2007, 2010 eta 2011an izan ziren).
ISO ziurtagiria
Bestalde, Getxoko Udala ADEAC-FEE erakundeak Arrigunagako hondartzari Bandera Urdina ez emateko arrazoien azalpenaren zain dago. Hondartza horrek, aipatu bereizgarria eskatzeaz gainera, Kalitatearen ISO 9001:2008 eta Ingurumenaren ISO 14001:2004 ziurtagiriak berresteko bidean da. Gogoratu behar da bai Arrigunagak bai Ereagak 2009an lortu zituztela ziurtagiri horiek lehendabiziko aldiz.
ISO ziurtagiriekin bete nahi diren helburuak, honako hauek dira: hondartzak baldintza higieniko-sanitario egokiekin erabili ahal izatea, erabiltzaileen segurtasun, higiene eta osasuna bermatuz, zerbitzuak eskainiz, etab., eta aldi berean, ekosistema hauetan egiten diren jardueren eragina txikiagotzea, ingurumenaren joera etengabe hobetzea bermatzeko.
Ereaga eta Azkorri-Gorrondatxe hondartzek bandera urdina eskuratu dute berriro
Algortako Ereaga eta Getxoko Azkorri-Gorrondatxe hondartzek bandera urdina jantziko dute, beste urte batez. Izan ere, Ingurumen-hezkuntza eta Kontsumitzaileen Elkarteak (ADEAC-FEE) 2012ko Bandera Urdina garaikurra eman die berriro Ereaga eta Azkorri-Gorrondatxe hondartzei. Ea herrikoarekin batera, EAEn erreferentziazko hondartzak izango dira, urte berri batez, beren ingurumen kudeaketari dagokionez. Ingurugiroa eta natura errespetatuz, itsasertzaren eta hondartzen gestioan egindako ahaleginagatik ematen zaie ikur hori Estatuko hondartza eta portu jasangarriei. Duela 25 urte hasi ziren ematen sariak. Bandera Urdinak aurretik ezarritako estandar batzuk bete izana egiaztatzen du, tartean, bainatzeko uraren kalitate ona, garbitasuna, informazioa, ingurugiroko hezkuntza, segurtasuna, zerbitzuak eta instalakuntzak. Bandera Urdinaren azken helburuak turismoaren garapen jasangarria eta hondartzarako eta gunerako ingurugiroko gestioa lortzea dira. Argazkian, bandera urdina Azkorrin / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun