Bihartik aurrera 24.000 lagun gehiago izango ditu euskararen lurraldeak

Erabiltzailearen aurpegia Ukberri 2012ko eka. 8a, 19:10

Bihar, larunbatarekin, UEMA Eguna hartuko du Goizueta Iruñerriko herriak, "Euskaraz bizi eta ari, herri euskaldunak aitzindari" lelopean. Festa egunaz gain, Udalerri Euskaldunen Mankomunitateak batzar "pozgarria" egingo du, Ondarroa, Mañaria, Getaria, Igantzi eta Oñatik UEMAn sartzeko egindako eskariak onartu eta bere baitan biltzeko. "Bost herri gehiago, 24.000 herritar gehiago, guztion artean indar handiagoa eta aitzindari lana hobeto egiteko, euskal hiztunon eskubideen alde", Maren Belastegi UEMAko lehendakariak azaldu duenez. Halaber, UEMA Egunaren baitan, mankomunitate euskaldunak berretsi egingo du euskalgintzako bi erakunde erreferenteekiko elkarlana. Batetik, UEMAk "Berria"-lagun izango dela iragarriko du, eta, horren bidez, laguntza emango dio "Berria" egunkariaren zabalkunde prozesuari. Bestetik, Hizkuntza Eskubideen Behatokiarekin hitzarmen berria sinatuko du, herri euskaldunetan hizkuntza eskubideen aldeko dinamikak indartzeko. Horretaz gain, jakina, egitarau zabala antolatu dute: herri bazkaria, dantzaldia, haurrentzako jokoak… Argazkian, Belastegi, erdian, zuzendaritzako kide gehienekin / © UEMA.

Maren Belastegi UEMAko lehendakariaren ustez, Goizuetako UEMA Egunari buruz mintzatzean ezin da aipatu gabe utzi Nafarroako Gobernuaren hizkuntza politika: "Argi eta ozen aldarrikatu nahi dugu, enegarren aldiz, zonaldekako banaketak desagertu egin behar duela, hizkuntza eskubide berberak eduki behar dituztela goizuetarrek, tafallarrek, erronkariarrek, lekunberriarrek, iruindarrek, lodosarrek, lizarratarrek eta tuterarrek, eta horiek guztiek aramaioarrek, gatikarrek edo zumaiarrek dituzten hizkuntza eskubide berberak eduki behar dituztela”. Halaber, UEMAk jokatu beharreko rolaz ere aritu da Belastegi: “Hizkuntza eskubideen aldarrikapen eta lorpenean aitzindari izan behar dugu, UEMAri dagokio helburu horietarako aitzindaritza lana egitea, aurrerapausoak ematea”.

Alaitz Escudero Goizuetako zinegotzi eta Nafarroako Iparraldeko Mankomunitateko lehendakariak euskararen arloan Nafarroan egin dituzten murrizketak kritikatu ditu, eta nabarmendu du indar handiagoa egin beharko litzatekeela hizkuntza politika aurrerakoia egiteko.

UEMA Egunaren irakurketa politikoaz gaindi, dei egin diete euskaltzaleei larunbatean Goizuetara joan daitezen, horretarako egitaraua aitzakia ona izango delakoan. Leloaren gaineko azalpenak ere eman dituzte, eta adierazi dute euskaraz bizitzeko eta aritzeko udalerri euskaldunak direla tokirik egokienak, eta, hain zuzen ere, horregatik dutela aukera beste toki batzuetan baino aurreratuago egoteko eta euskararen normalizazioan neurri aurrerakoiak hartzeko.

UEMA Egunaren egitaraua

uema_eguna_2012
Kultura
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun