Aspalditik datorren arazoa bada ere, unibertsitatera doazen autobusek emandako zerbitzua nahikoa ez dela dioten kexak gero eta gehiago dira. Izan ere, Uribe Kosta osoan campusera doazen autobusak Getxotik zein Areetatik baino ez dira irteten; gainontzeko herriek ez dute campuserako lotura zuzenik.
Garraio publiko bidez campusera igo nahi duten Sopelako biztanleek, metroa hartu behar dute Bidezabal, Algorta edo Areeta geltokietaraino, eta bertan, autobusez campusera igo. Garraio aldaketa hori korapilatsua izateaz gain, garesti irteten da erabiltzaileentzat, metroko urteko txartelak ez baitu autobuserako balio. Gainera, eskolarik ez dagoen egunetan, nahiz eta unibertsitatean beste ekitaldi batzuk egon (ikastaroak, administrazio lanak, tutoretzak, ikerketak, liburutegi zerbitzua...), Getxotik irteten diren lineek (2162 eta 2164) ez dute zerbitzurik betetzen. Bere zerbitzua erdira mugatuta (orduro), Areetako linea (2161) da dagoen bakarra.
Gauzak horrela, erabiltzaileak kexu dira, ordu bete baino gehiago behar izaten dutelako Sopelatik Erandio eta Leioako campusera heldu ahal izateko. Horrek guztiak, ondorio tamalgarri batera daramatza: campusean aparkaleku arazo larria dagoen arren, herri hauetatik guztietatik bertaratzeko kotxea da ibilgailurik merkeena eta erosoena.
Beraz, Sopelako Udalak arazo horri erantzuna emateko eskatzen dio Bizkaiko Foru Aldundiari, jarraikortasuna izango duen garraio publikoa bultzatuz, eta zerbitzu eraginkorra bermatuz.
Sopela eta Erandio eta Leioako campusa lotuko dituen autobus-linea berria sortzeko eskaera egin dio Sopelako Udalak Bizkaiko Foru Aldundiari. Bizkaiko Foru Aldundiak Bizkaibuseko autobus-linea guztien berrikusketa egiten ari da, eta horren harira, Sopelako udal bilkurak aipatu linea berria sortzeko eskaera egin du. Proposamena Bilduk aurkeztu zuen, eta koalizioaren aldeko botoak jasotzeaz gain, PSE-EE eta PPko zinegotzien babesa ere jaso zuen. EAJko zinegotziak, berriz, abstenitu ziren. Mozioak, gainera, aipatutako campusera doazen autobus-linea horien jarraipena egiteko eskaera egiten dio Bizkaiko Foru Aldundiari, zerbitzua erabiltzaileen beharrizanetara egokitu dezaten. Ikasle, irakasle zein langile asko dira egunero Euskal Herriko Unibertsitateko campus horretara hurbiltzen direnak, bai Sopelatik baita inguruko herrietatik ere. Zehazki, Sopelako 122 ikasle daude matrikulatuta campusean, eta beste 48 auzokidek irakasle edo administrari legez egiten dute lan bertan. Argazkian, Areeta eta campusa arteko A2161 lineako autobusa Leioako Iparragirre etorbidea zeharkatzen / © Leioako Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun