Bizkaiko Foru Aldundiak Gorlizen duen Fauna Basatia Sendatzeko Zentroan osatutako sei zozokume eta hiru kirikino askatuko dituzte umeek bihar, igandea, Meñakako Solluberako XVII. igoeran. Urtero herri igoera horretan parte-hartu ohi duten ehunka mendizaleen artean, txikienek ibilbide egoki bat izango dute, nekazaritza eta euskal mitologiari eskainitakoa eta txalaparta eta adarren soinez alaitua. Mari, Anbotoko dama, Meñakako Santillandi baselizaraino urreratuko da, eta Basajaun, Prakagorri eta Martin Txikiren laguntzarekin, umeen bidelagun izango da nekazaritzaren jatorrirako bidaia horretan. Txikiek hainbat landare eta lekaleren haziak ereingo dituzte baso txikien arteko ibilbidean zehar eta ondoren Aldundiaren zentroan sendatutako bederatzi animaliak askatuko dituzte. Argazkian, kirikino kume bat jaten Gorlizko aterpean / © Bizkaiko Foru Aldundia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun