"Abesbatza Getxoztarren Eguna topagune bilakatuko da eta aurten parte hartzen duten taldeetako kideek elkarren artean harremanak sendotu ahal izango dituzte", jakinarazi dute arduradunek. Koralek eskainiko duten egitarauan herri-abesti ugari bilduko dira, euskaraz zein espainolez. Mitxelena, Egia, Benito Lertxundi, Xabier Lete, Juan Carlos Perez, Pablo Sorozabal eta Mikel Laboaren kantak abestuko dituzte saioan, besteak beste.
Horrela, Getxo udalerriko abesbatzen trebeziaz zuzenean gozatu ahal izango dute ekimenera hurbilduko diren musikazaleek. Saioan parte hartzen duten talde horiek etengabe aritzen dira herri-ospakizunetan, lehiaketetan eta hainbat ekitalditan: Agate Deunako Koru Jaialdia, zenbait herritako Udaberriko Kontzertuetan, edota Bizkaiko Koralen Egunean, Euskal Herritik kanpo egindako saioak ahaztu gabe.
Etzi, igandearekin, Abesbatza Getxoztarren Eguna ospatuko dute Algortako Biotz Alai plazan. Aurtengo edizioa bosgarrena izango da eta, guztira, hamaika taldek hartuko dute parte, bakoitzak bi kanta eskainiz. Saioa arratsaldeko 6etan hasiko da eta sarrera doakoa izango da. Ekimen horren bitartez, "talde getxoztarrei omenaldia egin" nahi zaie eta, horretaz gain, udalerrian "errotze handia duen tradizioa" bultzatzea nahi dutela adierazi dute antolatzaileek. Saioan honako abesbatzak arituko dira: Biotz Alai, Erromoko Kantariak, Eskuz Esku, Gizatiar, Gorrondatxe, Irutasun, Itxartu, Ondarreta, Tangorako Soinutarrak, Zozoak eta, lehen aldiz, Andres Isasi musika eskolako abesbatza. Guztira, 400 bat abeslari bilduko dira ekitaldian. Argazkian, Ondarreta abesbatza.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun