"Euskara, protagonista"
Ekintza parte hartzaileak izango dira nagusi sanpedroetan eta karmenetan: koadrilen jaitsiera, kantaldiak, dantzaldiak, herri-bazkaria, pintxo-dastaketak, familiartean egiteko jolasak eta abar. "Aurten ez dugu etxean lotzeko aitzakiarik izango", jai batzordearen arabera. Izan ere, adin guztientzako jarduerak antolatu dituzte, umeak eta familiak kontuan hartuz, nerabe zein gazteak, heldu zein nagusiak. Umeentzako jaietako jolas parkea Zipiriñe eskolako patioan egongo da, baina orokorrean umeei eta familiari zuzendutako ekintzak udaletxe plazan eta herrian zehar ere izango dira. Gaztetxoei zuzendutako ekintzak, berriz, Artatza parkean eta Jauregizar plazan izango dira. Nagusien dantzaldi eta kantaldiei dagokionez, herri osotik banatuko dira.
Sopela jai-gune erraldoia bihurtuko da sanpedroetan. Herriaren erdigune osotik zabalduko da jai-giroa, gune guztietan giroa sortuz: kalejirak, antzerki ibiltariak, fanfarreak... Horrela, herrian zehar dauden taberna guztietan giroa sortuko da. Sopela jaietan dagoela ondo adierazteko, aurten herriko elkarteen irudi izango diren zapi erraldoiak eskegiko dira apainketa legez, kaleak alaitzeko eta sopeloztarrak jaien protagonista bihurtzeko.
Udalaren aburuz, "euskararen presentzia guztiz bermatua izango dugu jaietan, eskainiko diren bertso-saio, tailer, kontzertu eta bestelako ekintzen protagonista izango baita. Auzokideei dagokie gero, jaietan zehar, euskaraz berba egitea; dabilen mihiari ez zaio goroldiorik lotzen!".
Bestalde, sortzaile sopeloztarren lanak bultzatzeko asmoarekin, bertako musika-talde sopeloztarren kontzertuak izango dira, bai Sopelan bai Larrabasterran.
Jaietako datak
• San Pedro: ekainak 28, 29, 30 eta uztailak 1.
• Karmen: uztailak 13, 14, 15 eta 16.
Hilaren 28an Sopelak bere jaiei emango dizkie hasiera. Festak ate joka daudela, bihar, larunbata, orain arte isilpeko lanean egositakoa aurkeztuko du aurten sortutako Sopelako Jai Batzordeak. Topagune horretan, sopeloztar ugarik parte-hartu du.. Besteak beste, batzordean Udalaz gain, kultur elkarteak, kirol taldeak, guraso elkarteak, koadrilak eta gazte zein helduak batu dira. Jai Batzorde koloretsu horren helburua, beraz, jai koloretsuak sortzea izan da, parte hartzaileak, euskaldunak, parekideak, ekologikoak, adin guztietakoak eta herrikoiak. Jaien aurkezpena, beraz, 13:00etan egingo dute udaletxe plazan, eta bertan, jaien egitaraua aurkezteaz gain, jaietako kartela ikusi eta Miren Loizaga bertsolariak eta Jare musika taldeak egin duten Sopelako jaietako abestia entzuteko parada ere izango da. Argazkian, koadrila sopeloztarrek parte hartze handia izango dute aurtengo jaietan / © Gazte Asanblada Sopeloztarra.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun