Frankismoan eraildako Felix Arnaizi buruzko hitzaldia hartuko du bihar Itzubaltzetak
Bihar, astelehena, "Memoria egin, justizia egin" hitzaldia eskainiko du Martxelo Alvarez Ahaztuak 1936-1977 elkarteko kideak Itzubaltzeta / Romon. Hitzordua Lope de Vega kaleko kultur etxean jarri dute, 19:30ean. Ekimenaren xedea bikoitza da. Alde batetik, herri horretako 1969ko jaietan Francoren garaiko Getxoko udaltzain batek tiroz erail zuen Felix Arnaiz Maeso "Lagun" 20 urteko gazte leioaztarra zena gogoratzea. Beste aldetik, Eusko Jaurlaritzak berriki onartutako motibazio politikoko biktimen dekretuak Arnaiz biktima gisa onartua izan eta "zigorgabetasuna eta isiltasuna apurtuz" bere erailketa argitu dadin senideek eta Ahaztuak elkarteak darabilten borrokan zelan eragingo duen azaldu nahi dute solasaldiaren bidez. Izan ere, aipatu dekretua 1960 eta 1978 urteen artean Poliziaren gehiegikeria pairatu zutenei kalte-ordainak ematera bideratu dute. Argazkian, Martxelo Alvarez, Felix Arnaizen erretratu baten ondoan, iazko jaietan Arnaizi egindako omenaldian.
1969ko abuztuaren 2an, Felix Arnaiz Maeso koadrilakoekin zebilen Itzubaltzeta / Romoko jaietan, abesten eta txantxa giroan. Zoritxarrez, "Leza" izenordez ezaguna zen Getxoko alkateordea inguruan zen eta txarto hartu zuen Arnaizen eta lagunen poztasuna. Berak udaltzainei deitu eta giroa nahasi zen. Hainbat ordutan lekutik aldenduta ibili ostean, gazteak jaietara bueltatu ziren eta orduan hiru tiro bota zieten udaltzainek. Bi tiro desbideratzea lortu zuen atxilotuta eraman zuten mutil batek. Hirugarrenak, ordea, Felix hil zuen. Gaur mantentzen den bertsio ofizialaren arabera "istripuz" hil zen. Ez zen ikerketarik ezta epaiketarik ere egon, salaketa ken zezan familia xaxatu baitzuten. Egun ere, instituzioek ez dute Felix Frankismoaren biktimatzat aintzat hartzen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun