Rodriguezen egoera salatzeaz gain, estatu espainol eta frantsesak "konponbide demokratikoa oztopatzeko" egin duten "ildo errepresiboaren" hautua deitoratu dute eta auzokideak prozesuaren alde mobilizatu eta egungo egoera desblokeatzera deitu dituzte.
Espainiako Auzitegi Gorenak ekainaren 15ean lau urtetik hirura murriztu zion zigorra Rodriguezi, haietatik bi hilabete eta bost egun bete zituela 2007an. Larunbatean, falta den zigor zatia betetzeko atxilo hartu zuen Poliziak. Gorenak kaleratutako auto berean, Mikel De Gregorio gaztea absolbitu zuten.
Auzitegi Nazionalak 2011ko urrian zigortu zituen aipatu mutila eta eskualdeko beste hamar gazte absolbitu zituen. Izan ere, auziari Espainiako Polizia Nazionalaren Bilboko Informazio Brigada Probintzialak 2007ko urriaren 16an Uribe Kostan egindako atxiloketekin eman zitzaion hasiera. Guztiei kale borroka taldea osatu eta 2004tik 2007ko uztailera bitarteko hamar ekintza inguru leporatzen zieten. 2011ko irailaren 19tik 22ra epaitu zituzten. Gazteek hasieratik salatu zituzten tratu txarrak.
Manifestazioa argazkitan
Espainiako Poliziak pasa den larunbatean atxilotutako Josu Rodriguez "Nekora" gazte berangoztarra berehala aska dezaten eskatu dute gaur arratsean 250 lagunek baino gehiagok. Algortako kaleak manifestazioan zeharkatu ostean, Rodriguez egun Basauriko espetxean dagoela argitu du Joseba Elorriaga "Peski" Gazte 1+Ez! ekimeneko partaideak eta "Nekora" atxilotu zuten 2007ko sarekada bereko biktimak. Izan ere, lehenengo bertsioen arabera, gaztea Madrilen zegoela zabaldu zen. Elorriagaren esanetan, Rodriguezek bisita izan du eta igandean deitu ahal izan zuen. Gainera, modulu berean EPPKko beste lau preso daudela zehaztu du. Gogoratu duenez, 2007ko urriaren 16an Uribe Kostan egindako atxiloketei, tortura eta espetxeratzea gehitu zitzaizkien beranduago. Lau urte pasa behar izan ziren hamaika gazteren epaiketa heldu arte. Auzitegi Gorenaren aurrean aurkeztutako helegitearen ondoren, Josu Rodriguez da egun zigortu bakarra, inkomunikazio egoeran sinarazitako deklarazioetan oinarrituz, balizko kale borroka talde baterako Larrañazubin hainbat zulo egin eta zenbait erregai gordetzen lagundu zuelakoan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun