Algortako Portu Zaharreko Jai Batzordeak kartel lehiaketaren 19. edizioa abiatu du. Lanak Villamonte kaleko kultur etxean aurkeztu beharko dira, uztailaren 12a epemuga dela. Irabazleak 350 euro jasoko ditu. Bigarrenak, berriz, 150 euro. Horretaz gain, Portu Zaharreko jatetxe batean bi lagunentzako otordua zozkatuko dute parte hartzaile guztien artean. Kartelak bertikalak edo horizontalak izan daitezke, beti ere neurriak 70x50 zentimetro direla. Hori egiteko sistema digitalik erabili bada (eskuz egin dutenak ez), euskarri informatikoan ere aurkeztu behar izango da. Kartelaren atzeko aldean ezizenen bat jarriko da, eta berarekin batera, ezizen bera idatzita izango duen gutun-azala, barruan egilearen izen-abizenak, helbidea, telefono zenbakia eta posta elektronikoa dituela. Argibide gehiago eskatzeko portuzaharra[abildua]euskalerria.org posta elektronikora idatz daiteke. Aurtengo Portu Zaharreko jaiak abuztuaren 9tik 12ra izango dira. Argazkian, hainbat neska-mutil koadrilen proba batean.
Ohi bezala, gaia Portu Zaharreko jaiak izango da, baina egileek askatasun osoa dute irudiak, motiboak, bitxikeriak eta abarrak aukeratzeko orduan; baita kartela osatzeko teknikari dagokionez ere. Afixan, “Portu Zaharreko Jaiak 2011 - Abuztuak 9-12" testua derrigorrez agertu beharrekoa da. Epaimahaia jai batzordeko kideek eta bertoko artistek eta adituek osatuko dute. Sari banaketa uztailaren 13an izango da Portu Zaharreko plazan, arratsaldeko 8etan. Ondoren, 6 kartel bilduko dituen erakusketa egingo dute Portu Zaharra tabernan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun