Berangoko Folklore Jaialdia uztailaren 11n abiatuko da Lantzarten eta, hilaren 15era arte, egunero saio bat egongo da 20:30etan. "Ekitaldi honen arrakasta gero eta handiagoa da gure mugetatik kanpo", udal iturrien arabera, eta, aurten, Polinesiako Orti Here taldeak exotismoa islatuko du hiru kontinenteetatik etorritako taldeen parte hartzea izango duen jaialdiaren laugarren edizio honetan. Mexikoko Hidalgo herritik Alma Huastera Ballet Folklorikoa eta Son de Hidalgo mariachia helduko dira. Errusiatik bi ordezkari etorriko dira: Russia eta Group Ensenbel Wladimirez, hain zuzen ere. Azkenik, Erdialdeko Europatik Poloniako Bestwina Regionally Zespol Pierni eta Tanka, eta Alemaniako Erlangen herriko, Tanz und Folkloreensemble Inha taldeek parte hartuko dute. Algortako Biotz Alai abesbatza eta Berangoko Simon Otxandategi Dantza Taldea, antolatzailea, ere ez dira faltako. Argazkian, dantzak udaletxe ondoan Santo Domingo jaietan / © Berangoko Albisteak.
Simon Otxandategiko kide bakoitza jaialdiaren antolakuntzan murgildu da. Izan ere, parte-hartzaileei gosaria, bazkaria eta afaria emateaz gain, antolatutako aktibitate guztietara lagunduko dituzte, herria eta probintzia ezagutzeko prestatu dituzten txango eta bisita interesgarrietara, adibidez. Dantza taldearen lan bikainaz aparte, herriko 200 bat familien laguntza azpimarratu behar da, egun hauetan beraien etxeetan lo egingo duten abeslariak eta dantzariak hartzen dituztelako.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun