Alvaro Gonzalez Abra Getxo-Kirol Portuaren Administrazio-Kontseiluan udal Gobernu Taldeak duen ordezkariak adierazi duenez, zerbitzua emateko atrakaleku berriak “Itsasadarrean lanean dabiltzan enpresa turistikoen eskaerari erantzuten dio, eta horregatik eskaera hori bete zezakeen azpiegitura indartzeko eta modernizatzeko beharra ikusten genuen. Atrakaleku horrekin bidaiari kopuru handi baten ontziratze eta lehorreratzea egiteko gaitasuna duen eremua egokituko dugu”. Horren harira, Gonzalezek azpimarratu duenez, “Getxo helmuga erabat erakargarria da txango turistikoentzat eta Bibo-Getxo lotura guztiz interesgarria da, eta horregatik egin dugu azpiegitura horren aldeko apustua”.
40 metroko luzera
Atrakaleku osagarria, “azpiegitura samurra eta oso praktikoa”, hormigoi hutsarekin eginikoa izango da, ur gainean egon dadin, 40 metroko luzera eta 4 metroko zabalera edukiko ditu eta bertan 20 metroko luzera duten eta bidaiariak eramateko diren ontziek atrakatu ahal izango dute. "Bidaiarien ontziratzea eta lehorreratzea segurtasun handiagoarekin egitea bermatuko du, orain arte ipinitakoak mugatuak baitira, jasan dezaketen zamari dagokionez. Kaiarekin lotuko dute Kirol Portuan dauden gainontzeko plataformen oso antzekoa den pasabide lerrakor batez", Gonzalezek dioenez. Atrakalekura ainguratuta ur gaineko oholtza txiki bat egongo da, 5 x 2,5 metroko neurrikoa, atrakalekura bertara iristeko egongo den arrapalari zerbitzu egiteko. Pasabidera eta atrakalekura gidaridun atea izango duen plataforma bidez sartu beharko da, sarbidea mugatua izango den arren.
Getxoko Kirol Portuan bidaiarien itsasontziei zerbitzua emateko atrakalekua egokitzeko lanak aste honetan zuinketa-aktaren sinadurarekin hasiko dira, obra esleitzeko kontratua sinatu baitute jada. Obra horiek Bilboko Portu Agintaritzaren baimena daukate, eta udal arduradunek aurreikusten dute irailerako amaituta egotea. 197.823 eurotan esleitu dituzte lanak, eta horrela, aurreikusitako lizitazioan finkatutakoa baino 54.537 euro gutxiagotan. Abra Getxo-Kirol Portua da itsas azpiegitura berriaren ardura duen elkartea, Getxoko Udala eta Eusko Jaurlaritza partaide dituena. Kapitaintza eraikinaren eta Arriluzeko kai-muturraren artean atonduko dute atrakaleku berria, Bilboko itsasadarrean zehar dabiltzan turismo eta aisialdirako ontzien atrakatzea bermatzeko. "Bere helburua, hain zuen, Itsasadarrean gaur egun Getxora arteko txangoak eskaintzen dituzten enpresen eskaerari eta etorkizunean sor daitezkeen proposamenei erantzutea da. Ekimena, oro har, udalerriko, eta bereziki, Algortako Ereaga inguruko turismoa dinamizatu eta ekonomia suspertzeko Udalak bultzatutako jardueraren barruan dago", tokiko agintarien arabera. Argazkian, Queen Elisabeth 2 itsasontzia kaian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun