Euskara familia bidez transmititzeko kanpaina berria zabalduko dute eskualdeko udal guztiek
Alkarbide Bizkaiko Euskara Zerbitzuen Bilguneak "Eman giltza ama-aita!" goiburuko kanpaina jarri du martxan, euskara belaunaldiz belaunaldi transmititzeak duen garrantzia nabarmentzeko helburuarekin. Kanpaina lurraldeko ia 11.000 familiak jasoko dute eta, Alkarbidek Bizkaiko Foru Aldundiaren babesarekin koordinatuta, iaz martxan hasi zen. Egitasmoa 36 udalerri eta bi mankomunitatetara zabalduko da aurten, Uribe Kosta eta Erandioko udalak daudela. Ume jaioberriak eta 1 eta 6 urte bitarteko umeak dituzten gurasoek haurraren ingurune hurbilean euskara sustatzeko aholkuak batzen dituen diptikoa jasoko dute familiek etxeetan, eta euren kezka eta beldurrak uxatzeko prestatu den webgunearen berri ere izango dute. Horrez gain, adur-zapia, askari-poltsa eta "Ku-Ku" liburuxka eta CDa ere banatuko zaizkie. Liburuxka horretan abestiak, euskarazko oinarrizko hitzak eta esamoldeak daude jasota.
Alkarbidek koordinatutako eta Bizkaiko Foru Aldundiak babestutako egitasmo honen helburu nagusia da euskara belaunaldiz belaunaldi transmititzeak daukan garrantzia nabarmentzea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun