Auzitegi Nazionalak jaulgitako epaian frogatutzat eman zuten Getxon aurkitutako lehergaiak Cotanok garraiatu zituela, Guardia Zibilaren esku inkomunikatua zenean egindako deklarazioan oinarrituta. Gorenak, ordea, adierazpen berberak aintzat hartuz, Auzitegi Nazionalari egotzi dio ez duela azaldu nola heldu zen ondorio horretara. Francisco Monterde epailearen arabera, ez dago egiaztatua atxiloaldian gazteek halakorik esan zutenik, eta epaituek berek ere ukatu egin dute gerora.
Tortura salaketa ez du onartu
Aitor Cotanok, atxilotu zutenean torturatu egin zutela salatu, eta helegitea jarri zuen. Goikoetxeak ere salatu zuen Guardia Zibilaren esku egon zen inkomunikazio aldian torturatua izan zela. Egindako adierazpen guztiak egoera horren ondorio izan zirela jakinarazi zuten biek. Kasu horretan, ordea, Gorenak ez du aintzat hartu Cotanoren eskaera.
Aitor Cotano algortarraren defentsak helegitean azaldu zuenez, Cotanok ez zuen ustezko aferarekin loturarik eduki ez eta bere aurkako frogak torturen bidez inkomunikazio aldian sinarazitako deklarazioak izan ziren. Gainera, abokatuek nabarmendu zuten Guardia Zibilak ez zituela Cotano bideoz grabatu atxiloaldi osoan zehar, epailearen agindua urratuz.
Aitor Cotano eta Arkaitz Goikoetxea errugabe direla onartu du Auzitegi Gorenak
Espainiako Auzitegi Nazionalari arrazoia kendu eta Arkaitz Goikoetxea zein Aitor Cotano gazteak absolbitu ditu Gorenak, Abrako itsas-erret klubaren aurkako balizko atentatu saiakeraren auzian. "Berria" egunkariak zabaldu duenez, Auzitegi Nazionalak bi gazteen errugabetasun presuntzioa urratu zuela iritzi dio Gorenak. Getxoztarrari eta algortarrari zortzina urteko espetxe zigorra ezarri zieten pasa den azaroan, 2008an Areetako aipatu klubaren aurka saiatu zirelakoan. Auto berean, Iñigo Gutierrez absolbitu zuten. Gutierrez aske usteko arrazoia, hain zuzen ere, bere buruaren aurkako deklarazioak inkomunikazio egoeran sinatu zituela eta hori froga bakarra zela izan zen. Cotanoren defentsak ekainean aurkeztu zuen helegitea Gorenean eta horrek arrazoia eman dio, baita "Torrotxerori" ere. Hala ere, espetxean jarraituko dute biek, beste auzi batzuk direla eta. Bestalde, Cotanoren tortura salaketa ez dute aintzat hartu. Argazkian, Bizkaiko hedabide batek Aitor Cotanoren atxiloketaren harira eraikitako erreportajea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun