Beste urte batez, Getxoko Udalak “Eraso sexistarik gabeko Berdintasunezko jaien alde” kanpaina bultzatuko du. Lehenengo hitzordua igande honetan, uztailaren 22an, izango da Paellen Nazioarteko Lehiaketarekin eta hori dela eta, aipatutako leloa edukiko duten kartelak ipiniko dira Getxoko Aixerrotako inguruetan. "Laugarren urtez herritar guztiei eta bereziki gazteei zuzendutako ekimenak berdintasunezko jai eredua defendatzen du, pertsona guztiak gozatzeko elkartzen dituena, jokaera sexista gabekoa, eta emakumeak irtetea, paseatzea eta askatasun eta lasaitasun osoz ibiltzea ahalbidetzen duena", azaldu dute udal iturriek. Tokiko erakundeak udako jaietan guztira 800 kartel banatuko ditu, udalerriko ospakizun handienetan komertzioetan, ostalaritzako establezimenduetan eta udal egoitzetan ikusgai egon daitezen. Argazkian, Keltse Eiguren Berdintasun zinegotzia.
Keltse Eiguren Berdintasun zinegotziak adierazi du “etxeko lanen eta erantzukizunak partekatzeak duen garrantzia, emakumeek era berdinean astiaz gozatu ahal izateko, kasu honetan jaiez”. Eta “pertsona guztiek, inolako eraso sexistarik gabe, gozatu ahal izango duten jaien” alde egin du.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun